LAIN na usab nga establesemento ang gipahunong sa pagpa-operate sa Kagamhanan sa Dakbayan sa Lapu-Lapu kagahapon sa kaadlawon, Martes, Disyembre 10 gumikan sa pag-operate nga way business permit.
Ning higayona, ang gipasirad-an mao ang Pink House nga gipanag-iya sa usa ka Chinese national nga nailhang si Lin Lianyang. Nahimutang kini sa usa ka high-end subdivision sa Barangay Maribago.
Mismong si Lapu-Lapu City Mayor Junard “Ahong” Chan ang mi-serve sa cease and desist order sa naasoyng restaurant uban ang mga sakop sa City Legal Office sa dakbayan.
Wa hinuon sa restaurant ang tag-iyang si Lin pag-serve ni Chan sa order gawas sa iyang nagpailang manager ug laing lima ka mga trabahanteng Chinese national. Ang naasoyng mga Chinese national wa motug-an sa ilang mga ngalan sanglit matod pa ang ilang mga passport tua sa Bureau of Immigration (BI) dihang gipaninglan ni Chan.
Gidawat ra hinuon sa nagpailang manager ang cease and desist order nga gi-serve sa mayor. (GCM)