DUL-AN sa P200 million nga balor sa illegal nga drugas nga mga ebidensya kansang mga kaso aduna nay desisyon ug pending pa sa korte gisunog na sa pasilidad sa Apo Cement factory sa Dakbayan sa Naga pinangulohan sa Philippine Drug Enforcement Agency 7 ug Police Regional Office 7 human makakuhag pagtugot sa korte.
Ang pagsunog, nga giuyonan sa mga korte sa Dakbayan sa Sugbo, Lapu-Lapu, Mandaue ug Probinsya sa Sugbo pinaagi sa hangyo sa kapulisan ug PDEA 7, gipangulohan ni Cebu Governor Gwendolyn Garcia.
Sa wala pa kini hingpit nga gilunod sa thermal decomposition facility sa Apo Cement Corporation (Apocemco), gipaubos una sa testing sa mga chemist ang mga ebidensya aron ipakita sa mga saksi sama sa media ug ubang representante nga kompirmador nga illegal nga drugas ang ilang gub-on.
Gipasabot sa Cemex Holdings Philippines, tag-iya sa Apocemco, nga human sa paglunod sa kinilo nga illegal nga drugas sa ilang pasilidad, segundo lang mawagtang na kini.
Way aso ug abog ang mahabilin tungod sa kainit sa kayo sa thermal decomposition sa factory.
Gidala dayon ang maong mga butang sa ikaupat nga andana sa factory diin didto gilunod ang pinutos nga illegal nga drugas sa kayo nga gibana-bana nga adunay kainiton nga kapin sa one thousand degrees Celcius.
Nangulo sa pagtunod sa drugas si Garcia, hepe sa PDEA 7 Wardley Getalla, Police Brigadier General Valeriano de Leon ug mga huwes sa Metro Cebu.
Matod ni Getalla nga kapin sa 28 kilos sa shabu ang ilang gisunog nga mobalor og P182,603,633.40.
Moabot usab og 52 kilos ang marijuana nga mokantidad og P6,300,559.92 samtang 976 gramos nga cocaine nga mo kantidad og P5,177,040 apil sa gisunog.
Giapil usab ang Nubain nga mokantidad og P139,772.50.
Aduna pay kapin sa 30 kilos nga naa sa kustodiya sa PDEA 7 samtang 120 kilos usab ang naa pa sa PNP Crime Laboratory nga wa pa mahukmi sa korte nga angay nang sunugon.
Way recycling
“This is a manifestation that our evidence were properly recorded and handled and we assure that there will be no evidence that might be the subject for any recycling activity as mentioned in the news. So, we are very strict with that and we are working closely with the PNP to eliminate those act,” matod ni Director Wardley Getalla.
Si Police Brigadier General Valeriano de Leon, hepe sa PRO 7, nagkanayon nga ning pagsunog sa mga ebidensya sa illegal nga drugas nga naa sa ilang poder, pagpakita kini nga ang kapulisan seryuso sa pag puhag sa illegal nga drugas.
Tinguha niya, uban ang gobernador ug sa Regional Trial Court, nga ang nahabilin nga kapin sa 120 kilos nga shabu nga naa sa evidence facility sa PNP Crime Laboratory isunod na usab sa pagsunog aron kalikayan ang pag recycle.
“We are awaiting again from the order of the court. I was closely talking to the governor to further encourage the RTC in compliance to the procedure of destruction of drugs to immediately issue orders,” matod ni de Leon.
Naglaom si RTC 7 Executive Judge Macaundas Hadjirasul nga sa mosunod nga mga buwan aduna na usab silay masunog nga illegal nga drugas.
Matod niya nga sa pagkakaron aduna pay pending nga mga kaso sa korte nga nagpadayon pa ang pagdungog apan mahimo ra nga makamando sila kon aduna na unyay madesisyonan.
Gipasabot hinuon ni Hadjirasul nga ang peligro nga maka recycle ang mga ninja cops mao kadtong mga ebidensya nga ilang makuha nga walay gipasaka nga kaso ngadto sa korte.
Ning pagsunog na sa mga ebidensya sa illegal nga drugas, matod ni Hadjirasul nga maghatag kinig mensahe ngadto sa mga naa nagtrabaho sa gobyerno nga kinahanglan nga doblehon ang ilang trabaho. (AYB)