BISAN wa nasungkit ni Gazini Ganados ang korona sa Miss Universe niadtong miaging adlaw, apan segurado na ang kampyenato sa Pilipinas sa gihimo nga Southeast Asian (SEA) Games 2019 nga gihimo dinhi sa nasud.
Tiaw mo na nga alas 10:50 sa gabii pa lamang niadtong Lunes, ang Pilipinas nakasungkit na og 137 ka gold, 102 ka silver, ug 106 ka bronze medals nga misumada sa kinatibuk-an nga 245 ka mga medalya.
Gisundan kini sa Thailand nga dunay kinatibuk-an nga 277 ka mga medalya ug Vietnam nga dunay 253 ka mga medalya.
Daghan kaayo kanatong mga Pinoy ang nalipay ug mapasigarbuhon tungod sa kalampusan sa mga atletang Pinoy.
Sa mga tapuk-tapok sa akong mga higala nga palahubog, bida kaayo ang mga Pinoy sa ilang dinakpanay og baso.
Gani, dunay usa nga naglisud na og istorya, nangutana sa iyang mga barkada kung unsa ang hinungdan nga gamay ra man ang madala nga medalya sa mga Pinoy kung sa laing nasud himuon ang SEA Games.
Tubag sab sa gisid-ok na niyang higala: “Tungod kay palpak ang Aquino administration. Walay suporta sa mga atleta. Di pareha karon nga pinangga sila ni Tatay Digong.”
Ako nga nagpaminaw lang sa ilang istorya (kay di man lagi ko moinom), nakaingon ko nga may puntos sab ning akong higala.
Sagbat sab sa usa ka nag-atras-abante na ang linakwan: “Bitaw, bay, tan-awa ra gud... bag-o pa nahimong presidente si Mayor Digong, gipahimo dayon niya ang mga venue sa dula sa SEA Games.”
Ug nagdungan sab sila pagtubag: “Mao na ang among gibiliban ni Mr. President - Aksyon dayon. Tan-awa, dinhi lang sa Pilipinas ang bongga kaayo nga SEA Games hosting.”
Siyempre, kay kapoy na makig-istorya sa mga hubog, nagyangu-yango ra gyud ko sa ilang mga gipangyawit kay tinuod man sab kini nga nahitabo.
Hangtud nga miabot na ang istorya sa mga proyekto sa gobyerno nga kasamtangan nga gihimo karon.
Suma nila, tungod kay maayo nga lider ang atong Pangulo, mao ni nga daghan kaayong proyekto ang nakita karon sa social media.
Dugang pa nila nga walay bisan usa ka proyekto nga nahimo ang kanhi administrasyon.
Apan tungod kay di nako kinaiya nga mosupak sa mga nakainom nga tawo, ako lang ipaaabot dinhi nga sa di pa kita motuo sa ubang tawo, atong subayon ang mga kasaligan nga tinubdan ug dokumento ilabina kung magkompara kita sa kalampusan sa milabay nga mga administrasyon.
Nganong ako kining giingon dinhi? Kini tungod kay basin unya og motuo kita
sa propaganda sa mga tawo, nakalimot kita sa burukrasiya sa gobyerno nga dugay kaayo mahuman ang proyekto mao nga magtuo kita nga wa gyuy nahimo ang milabay nga mga opisyales sa gobyerno.