NAIBOT sa Toril Police Station ang lima ka mga tambok nga punoan sa marijuana sa milabay nga semana samtang nagsilbi sila og warrant of arrest batok sa ilang target nga si Sherwin Taberin Manayon.
Sa impormasyon gikan sa Davao City Police Office (DCPO) alas 5 sa kaadlawon, ang intel ug warrant officers sa Toril PNP nga gipangunahan ni Lieutenant Colonel Jed Clamor, nihatud sa warrant of arrest ni Manayon dunay criminal case number 57357-05 sa paglapas sa Article 2 sa Republic Act 9165 nga giisyu ni Judge Romeo C. Albarasin sa Branch 9 sa Regional Trial Court (RTC-Davao Region).
Dihang padung na sila sa dapit, namatikdan sa suspek nga dunay mga pulis hinungdan nga dali kining misibat, ug ilang nakita ang lima ka mga punoan sa marijuana nga gituohang gitanum sa suspek.
Mga narekober nga mga marijuana plants gi-turn over na sa Regional Crime Laboratory Office (RCLO-Davao City) alang sa laboratory examination ug tukmang disposasyon. (Jeepy P. Compio)