DAGHAN ang nasubo ug nabalaka sa makaloluoy nga gidangatan ni Carlo Mangitngit, ang second year high school nga sakristan nga gipusil-patay sa mga tulisan tungod lang sa Nokia 3310 nga nikantidad og P 500.

Ni-email ning maong kolum si Elias Amora, Jr. ug si Titus Noval. Way duda nga ang ilang kasubo ug kabalaka gibati usab sa mga nagmahal sa kalinaw.

"The Manny Pacquiao Blog". Click here for stories and updates on the Filipino boxing champ.

Nia ang gikan ni Elias: “ Dear Atty: Usa ka masubong hitabo ang dili madawat sa usa ka inahan ug amahan ang nahitabo sa ilang buotan nga anak. Naunsa na man diay kining atong kalibotan karon? Nganong sayon ra pag-kutlo sa kinabuhi karon? Asa nalang kita paingon? Gani dili lang kini mahitabo sa atong kakarsadahan bisan gali sa sulod sa atong mga panimalay. Unsa man kaha ang maayong buhaton nato karon ug asa naman diay ang saktong dapit nga gitawag ug luwas sa atong dakbayan karon?

Ang mga patay karon ug mga dagko nga panghitabo kanunay gyung naglambigit og mga batan-on. Kon dili man sila ang biktima sila usab ang biktima. Asa ug kanus-a kutob kaning mga panghitabo ug kanus-a kini aksyonan sa atong kagamhanan? Ka grabe ka bangis karon sa mga mananap sa syudad ikompara sa gi tawag ug mga bangis nga mananap sa lasang.

Asa na ang luwas nga dapit karon para sa atong mga anak? Salamat.”

Nia ang gikan ni Titus: “ Good morning Mr Ruphil, Birada ko gamay sa imong column karon! Unsa man kaha nga matang pagahimuon sa atong gobyerno aron sa tinuoray makapakurog gyud sa tuhod niining mga kriminal?

Sa akong tan-aw dugay naman kita ug ang atong gobyerno nahigmata niining mga pagsiaw sa krimen sa tulis lakip na gani niining frat wars nga nakakalas na sa daghang kaayong mga inosente nga mga batan-on diha sa kadalanan pero nagkagrabe kay didto-diri naman hinoon ang patay, ug gani kita naman hinuon ang mangurog nga maglakaw sa kadalanan karon kay sama sa walay kasiguruhan ang atong seguridad.

Swerti-swerti lang gyud hinoon pero mas bentaha kon adunahan pa si Carlo kay pwede man siya magsakay sa Pajero inig palit niyag kamunggay!

Swerti sab kadtong mga tulisan tungod kay safety ang ilang kinabuhi sa dihang sila gisikop sa atong kapulisan kaysa ni Carlo sa dihang ilang gitulis.

Unsa kaha ang maayo natong matampo aron makapakurog sa mga kriminal? Salamat, Titus.”

Duha ka mga pangutana nga bisan ako maglisod og tubag.

(birada_ruphil@yahoo.com)