PRESKO pa gikan sa ilang kampanya sa Mindanao, ang Southwestern University-Phinma (SWU) Cobras mikutlo og impresibong kadaugan sa ilang unang misyon sa 2019 Minglanilla Mayor's Cup Inter-collegiate Christmas League nga gipahigayon sa Sports Complex sa lungsod sa Minglanilla, Cebu, Martes, Disyembre 10, 2019.
Ang Cobras, kasamtangang kampiyon sa Cebu Schools Athletic Foundation, Inc. (Cesafi), yanong midabo-dabo sa mga batan-ong University of San Jose Recoletos (USJ-R) Jaguars, 84-55, aron irehistro ang unang daog.
Si Thiam Lamine ug Red Cachuela tagsatagsang mitali og 12 puntos alang sa Cobras ni coach Mike Reyes nga nakigbatok sa Jaguars nga walay import.
Gikan pa lang sa pagsugod sa duwa, dali gilayong miarangkada ang Cobras, 10-0, ug wa na gyud kini molingi pa.
Sa preliminary game, gilubong sa University of the Visayas (UV) Baby Lancers ang Talisay City Aquastars, 109, 75, sa usa ka tuneup match.
Karong gabii, kulbahinam nga panag-engkuwentro ang gipaabot nga masaksihan, sanglit ikasangka sa Cobras ang wa pay pildi nga University of Southern Philippines Foundation (USPF) Panthers nga moparada usab sa ilang import nga si Sameen Swint.
Niadtong Lunes, si Swint mipakatap og 41 puntos sa dihang ilang gipakaging ang defending champion University of the UV Green Lancers.
Apan batok sa Cobras, masuwayan ang kahait ni Swint sa opensa sanglit iya na man ikabagat si Lamine, ang gihulagway nga usa sa pinakamaayong import karon sa Sugbo.
Hinuon ang suporta sa mga locals mao'y laing butang nga makahatag og dugang kaikag sa panag-engwentro.
Sa Panthers, anaa ang mga beteranong sila si Aljie Mendez, Lyndon Colina, Rodelio Cauba Jr. ug Spencer Patalinhug nga makig-ayoda sa mga batos ni coach Brian Jereza.
Samtang ang Cobras, mosandig usab sa Cesafi most valuable player awardee nga si Shaquille Imperial, uban sa ilang beterano usab nga si Dyll Roncal, Gerald Fernandez ug William Polican.
Sa opening game, ang USPF Baby Panthers mosakbang sa Minglanilla Archangels sa usa ka special match.
Mga puntos:
SWU (84) - Lamine 12, Cachuela 12, Alforque 11, Sanchez 9, Imperial 9, Fernandez 8, Bilao 8, Roncal 6, Evardo 4, Cabahug 3,
Nazareno 2.
USJ-R (55) -Echavez 11, Abarquez 9, Robles 8, Carin 7, Tabio 5, Gilbuena 5, Mendoza 4, Paras 4, Rodriguez 3, Gaviola 2. JBM