8 sikop sa 'Oplan Limpyo' sa Talisay

WALO ka mga tawo, diin upat kanila mga babaye ug usa niini menor de edad, ang nasikop sa kapulisan sa dakbayan sa Talisay sa duha ka anti-drug operation sa Martes sa hapon ug gabii, Dec. 10, 2019.

Ang maong mga operation kabahin sa Oplan Limpyo Talisay nga gipanguluhan sa hepe sa lokal nga kapulisan sa dakbayan nga si Police Maj. Gerard Ace Pelare.

Nasakmit sa kapulisan ang dili momenos P145,000 na balor sa ilegal nga drogas.

Unang nasikop ang mag-live-in partner nga sila Noel Resoena, 39 anyos, kinsa maoy target sa operasyon, ug si Roila Abellana, 37 anyos.

Ang duha nasikop niadtong alas 3:30 Martes sa hapon diha sa Sitio Sentro, Barangay Pooc, dakbayan sa Talisay.

Si Resoena giila sa Talisay City Police Station nga newly identified drug player.

Nakuha sa duha ka suspetsado ang mga pinakete sa ginadili nga drogas nga mobalor sa kapin P37,000.

Pagka-gabii sa samang adlaw, laing unom ang mga nasikop kinsa parehong anaa sa drug watchlist sa TCPS.

Ang mga nasikop giila nga sila Ronald Menguito, 38 anyos, molupyo sa Zone 3, Barangay Biasong sa maong syudad, kinsa maoy subject sa operasyon; uban na ang iyang live-in partner nga si Anabel Abellana, 37 anyos, kinsa lumad nga taga lungsod sa Cordova.

Laing nasikop sila si Kennith Ben Solis, 32 anyos; Marylou Villegas Alipio, 30 anyos; Mateo Ortis Basillote, 27 anyos; usa ka habal-habal driver, ug laing usa ka babaye nga menor de edad.

Matud ni Pelare nga nakadawat na sila og mga taho kalabot sa pagpamaligya ug paggamit sa illegal nga drugas sa maong dapit.

Usa sa ilang gisusi kon gihimo na nga drug den ang panimay ni Menguito.

Usa sa gikabalak-an ni Pelare nga sagad sa mga nadakpan mga babaye, ilabi na ang 17-anyos nga minor de edag, ug gipaubos kini sa mas lawom nga pakisusi kon kabutbut-on nila ang pagkuyog ug pagkalambigit sa drogas ug kon ngano nadangat sa ilegal sa aktibidades.

Nakuha gikan sa unom ang 15.57 gramos sa gidudahan nga shabu nga mobalor sa P105,876.00. (Superbalita Cebu)