DI IKATUGBANG ang katam-is sa unang higayon.
Kini mao karon ang nasinati sa higanting Sugboanon nga si June Mar Fajardo, human nga ang Gilas Pilipinas midominar na usab sa Southeast Asian Games men’s basketball pinaagi sa pagpukan sa Thailand, 115-81, sa finals sa Mall of Asia Arena, Martes, Disyembre 10.
Matawag na karon ang iyang kaugalingon nga SEA Games medalist sa ika-18 nga pagpanghawod sa Pilipinas basketball.
Daghan na man tuod siyang naangkon nga mga prestisyusong pasidungog sama sa iyang mga awards sa PBA nga naglakip sa lima ka MVP awards ug walo ka titulo - apan kining maong gold medal mas labaw pa sa tanan.
“Iki-keep ko ito hanggang sa tumanda ako, hanggang sa mawala ako sa PBA. Sobrang ganda,” matod ni Fajardo nga nakutloan sa Rappler.com ug mapasigarbuhon kaayong mipakita sa iyang gold medal.
“Sobrang blessed kami na binigyan kami ni God ng opportunity na makakuha ng gold so sobrang happy ko na nakakuha ako ng gold. Pwede siguro itong isangla, ano?” dalang pangumediya sa lumad nga taga Pinamungajan, Cebu.
Daw og sa nagkindang-kindang ang dagan sa karera ni Fajardo karong tuiga.
Uban sa kinatibuk-ang puwersa sa San Miguel, ilang nalangkat ang unang duha ka titulo sa PBA season ug nagkinahanglan na lang og usa ka daog aron makasakmit sa talagsaong Grand Slam title.
Apan nakawang ang tanang tinguha human nga nataktak sila sa quarterfinals sa nagpadayon nga Governor’s Cup.
Laing masakit nga natagamtam ni Fajardo mao ang ilang bati nga kampanya sa Fiba World Cup diin sa lima ka duwa permi silang gikulata, ug sa 32 ka nasod nga misalmot sila maoy anaa sa katapusang dapit.
Apan sa wala damha, ang tuig 2019 nahimong mabulokon ni Fajardo human nga iya kining natuldokan og usa ka gold medal nga dili niya hikalimtan hangtod sa kahangtoran.
“First gold ko sa SEA Games. Hindi ko alam kung kailan ulit ako makakalaro sa SEA Games. Ito ‘yung una so sobrang saya. Emotional ako ngayon,” panapos sa produkto sa University of Cebu. (JBM)