MGA duwa karon:
6:30 pm. - San Fernando vs. Roxie’s Internet
8:00 pm. - SWU vs. UV (College)
Sa unang higayon human sa ilang championship series sa niaging buwan, mag-abot na usab ang Southwestern University-Phinma (SWU) Cobras ug University of the Visayas (UV) Green Lancers karong gabii sa katapusang adlaw sa elimination round sa 2019 Minglanilla Mayor’s Cup Inter-collegiate Christmas League sa sports complex sa lungsod sa Minglanilla, Sugbo.
Ang Cobras ni coach Mike Reyes, igsuon ni kanhi RP Gilas coach Chot Reyes, mao karon ang bag-ong kampiyon sa Cesafi men’s basketball human niya putla ang dominasyon sa Lancers sa ilang best-of-three finals sa niaging buwan.
Ang Lancers maoy kasamtangang defending champion sa Minglanilla Mayor’s Cup hinungdan nga dili gusto si UV coach Gary Cortes nga, sama sa Cesafi, mawagtangan na usab sila og kampiyonato.
Niini, hugot nga kampanya ang anaa karon sa alimpatakan ni Cortes kansang Lancers napukan sa University of Southern Philipppines Foundation (USPF) Panthers, 110-105, niadtong Lunes human sa ilang dakong kadaugan batok sa Jaguars nianang pagka-Dominggo.
Wa pa man tuod mogamit si Cortes sa iyang import, apan ang Lancers mipakita og saktong labok nga gamit ang ilang mga locals nga pinangulohan sa beteranong si Jancork Cabahug ug Gileant Delator.
Gipaabot nga makahatag usab sa ilang suporta ang batan-ong si Gab Cometa uban nila ni AJ Sacayan, Giesel Tarosa, Melvin Butohan ug Michael Maestre.
Sa ilang bahin, ang Cobras yanong midabo-dabo sa Jaguars, 84-55, niadtong Martes, Disyembre 10, aron irehistro ang ilang unang daog.
Si Thiam Lamine ug Red Cachuela tagsatagsang mitali og 12 puntos alang sa Cobras ni coach Mike Reyes nga nakigbatok sa Jaguars nga walay import.
Gikan pa lang sa pagsugod sa duwa, dali gilayong miarangkada ang Cobras, 10-0, ug wa na gyud kini molingi pa.
Mitimang usab sa ilang opensa ang kasamtangang MVP awardee nga si Shaq Imperial, Dyll Roncal, Kent Sanchez, John Evardo ug Gerald Fernandez.
Sa preliminary game, gilubong sa UV Baby Lancers ang Talisay City Aquastars, 109, 75, sa usa ka tuneup match.
Mga puntos:
SWU (84) - Lamine 12, Cachuela 12, Alforque 11, Sanchez 9, Imperial 9, Fernandez 8, Bilao 8, Roncal 6, Evardo 4, Cabahug 3, Nazareno 2.
USJ-R (55) -Echavez 11, Abarquez 9, Robles 8, Carin 7, Tabio 5, Gilbuena 5, Mendoza 4, Paras 4, Rodriguez 3, Gaviola 2. (JBM)