SUBAY sa umaabot nga selebrasyon sa Pasko ug bag-ong tuig, ipaubos na unya sugod sunod semana ang tanang pampubliko nga ospital sa 'code white.'
Samtang uwahing adlaw na sa mga tinun-an sa elementarya ug high school sa public schools karong Biyernes, Disyembre 13 tungod kay magsugod na ilang tulo ka semana nga bakasyon.
Matod ni Dr. Shelbay Blanco, pangu sa Health Emergency Management Staff (HEMS) sa Department of Health (DOH) 7 nga magsugod ang ilang code white alert sa Disyembre 21 ug molungtad kini hangtod Enero 5.
“For code white, there is expected personnel to man all trauma cases especially firework-related injuries at all times during the specified period in all DOH hospitals,” si Blanco nagkanayon.
Nasayran nga sa nakalabay nga Pasko ug bag-ong tuig, niabot sa 67 ang nabiktima niini, base sa uwahing datus niadtong Enero 4, 2019.
Mas taas kini itandi sa 54 ka kaso niadtong Enero 4, 2018.
Base sa trend, nakita nga nag-una ang lalawigan sa Sugbo sa gidaghanon sa mga nabuthan sa Central Visayas.
Sa Enero 2019 nga datus anaa sa 53 ka kaso sa injury ang natala sa Sugbo, 4 niini ang nabuthan nga naputlan og parte sa lawas, 39 niini nabuthan lang, 7 ang naigo ang mata, ug 3 ang naigo sa saag nga bala.
Sa Enero 2018 anaa sa 43 ka kaso sa injury ang natala sa Sugbo, 1 niini ang nabuthan nga naputlan og parte sa lawas, 34 niini anh nabuthan lang, 7 ang naigo ang mata, ug 1 ang naigo sa saag nga bala.
Ang Department of Education (DepEd) 7 sa ilang bahin nipahihawo usab nga Disyembre 15 ang last day sa mga tinun-an sa elementarya ug high school sa ilahang klase.
Apan tungod kay Dominggo kini, sagad sa klase mahuman sa Disyembre 13, Biyernes.
“Actually December 15 na pero kasagaran sa schools Friday raman kutob wa naman klase sa Saturday, mao siguro nahulog nga 13 pero 15 na sa among calendar,” matod ni Amaryllis Villarmia, ang tigpamaba sa DepEd 7.
Dugang niini nga sa private schools, magdepende kini sa administrasyon sa tunghaan.
“Then ang private schools depende na sa ilang admin ang Christmas break. Basta ang public December 15.” (HBL)