ATOL sa bag-ong tuig sa 2020, bag-o na usab nga pamaagi ang ipatuman sa lalawigan sa Sugbo sa Cebu South Bus Terminal (CSBT) aron mamenosan ang manual nga pag-isyu og ticket sa mga pasahero, kini ang tap card.
Sa ingon niini nga paagi, gipanglantawan ang mas paspas og mas hapsay na ang pag sulod gawas sa mga pasahero sa terminal ilabi na kon rush hour o peak season. Ang maong lakang parte lang sa himuong modernization sa Gobernador Gwendolyn Garcia sa CSBT.
Gipatawag ni Garcia ang mga bus operators nga nag gamit sa terminal aron ipakita kanila ang bag-o nga proseso.
Pinaagi sa pag load sa maong card sama sa usa ka cellphone og igo na lang nga mo-tap ang pasahero inig saka og inig naog sa bus. Awtomatik na usab nga kaltasan ang load sa plite depende na usab sa lugar nga naogan sa mga pasahero.
Ang mga bus operators nga mopatuman sa maong pamaagi pamutangan usab kini ug pasilidad diin asa nila i-tap ang mga cards.
Susama usab kini sa pamaagi nga gibuhat sa laing nasud, sama na lang sa Australia, London, Malaysia, Singapore og uban pa nga nasud sa Europa.
Kung maaprubahan na kini sa sunod tuig, dili na kinahanglan pa nga maglinya ug dugay ang mga pasahero tungod kay mapalit nila daan online og maka pa-load usab sila ug credits ngadto sa mga accredited nga mga tindahan.
Uyon usab niini ang ubang mga bus operators sa maong paagi tungod kay mas matunhay ang sistema sulod sa terminal.
Sa pagkakaron isip pagpangandam sa maong sistema, sutaon una sa mga bus operators ang fare matrix sa matag destinasyon sa mga pasahero. (ANV)