Lapus: 5 ka BOD sa MCWD gipangtangtangna sa LWUA

HINGPIT na ang pagkatangtang sa lima ka mga Board of Directors (BOD) sa Metro Cebu Water District (MCWD) human gi-aprobahan sa Local Water Utilities Administration (LWUA) ang notice of termination nga giluwatan ni Mayor Edgardo Labella niadtong Oktubre 15.

Ang LWUA ubos sa liderato ni Acting Administrator Jeci Lapus nipahigayon og review sa notice of termination ni Labella gumikan sa isyu sa trust and confidence ug diskuntento sa ilang serbisyo subay usab sa gipasar nga mga resolution sa 9 ka local government unit sa Metro Cebu apil na ang Kapitolyo.

Nipakanaog og desisyon ang LWUA niadtong Disyembre 5 kon 50 ka adlaw human sila gitangtang ni Labella sa katungdanan diin sila nipahigayon og makuti nga pag-review uh ilang gihatagan og kahigayonan nga makatubag ang mga board of directors apan wala gitubag ang ilang mga suwat nga gipadala niadtong Nobyembre 15.

“ To make sure that the consumer are properly and fully represented in the MCWD Board, our office is mandated to initiate the necessary changes which include terminating the members of the MCWD Board and proceed to the process of solicitation, nomination and appointment of the new set of members of MCWD Board” Tipik sa hukom ni Lapus.

“Wherefore, foregoing premises considered, this office leaves no other recourse but to cause their termination to save the MCWD from further public disgrace and to regain public trust to MCWD” Dugang sa Acting Administrator.

Ang mga board member nga apektado gilangkuban nilang Atty. Cecilia Adlawan, Augustus Pe Jr., Atty. Procopio Fernandez ug Atty. Ralph Sevilla sanglit ang ilang chairman nga si Joel Mari Yu, una rang niduso sa iyang resignasyon duha ka semana human sa order ni Labella.

Ang Superbalita nisuway og text ug tawag kang Pe kinsa maoy gitudlo nga chairman sa BOD human ni-resign si Yu apan walay nitubag sa iyang cellphon samtang gitawagan usab ning pamantalaan si Charmaine Rodriguez-Kara kinsa maoy spokesperson sa MCWD apan di sab siya makontak para unta makuhaan sa ilang habig.

Base sa order ni Lapus, ang interim board nga maoy gibutang sa LWUA sa MCWD niadtong wala pa nila nahusay ang notice of termination sa mayor mamahimo nang mosugod pagdawat og nominasyon gikan sa mga sector para mahimong member sa MCWD Board of Directors subay sa mga provision ilawom sa Presidential Decree 198.

Lakip sa mga sector nga miyembro sa MCWD Board mao ang edukasyon, professional, business, women ug civic nga maoy gi-representahan sa lima ka mga BOD nga gitangtang ni Labella.

Si Lapus niingon nga ilang gipa-ubos sa makuti nga pag-review ang termination order sa mayor sa dakbayan sa Sugbo gumikan kay ilang nakita nga wala kini masubay sa husto nga proceso.

Matod ni Lapus nga sa ilang tan-aw, nahikawan ang mga sakop sa BOD sa administrative due process ug wala mahatagi og kahigayonan nga makapadayag sa ilang kaugalingon hinungdan nga sa ilang pag-review bisan paman kon ang rason sa ilang pagkatangtang mao ang ubos nga kalidad sa ilang serbisyo ug pagkawagtang sa salig ug kumpyansa. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph