GIPAHIBAWO sa Home Development Mutual Fund (HDMF) o mas naila nga Pag-IBIG nga mosaka ang binuwan nga kontribusyon sa matag miyembro sa umaabot nga 2021 ug 2023.
Matod ni Rio Teves, vice-president sa Member Services Operations for Visayas and Mindanao sa Pag-IBIG Fund, nga ila kining gituyo aron sila maka-suporta sa demand sa housing program.
Gawas niini, mosaka usab ang savings sa mga miyembro tungod niini.
Sa kasamtangan, anaa lang sa P100 ang monthly contribution sa ilang mga miyembro samtang P100 ang counterpart sa mga employers.
Gitug-an ni Teves nga nauyonan sa ilang mga board member nga himuong P150 ang monthly contribution sa 2021, gawas pa sa counterpart sa mga employers nga P150. Samtang sa 2023, himuon na kining P200 ug susamang kantidad ang counterpart sa employers.
Hinuon, matod ni Teves nga taliwa sa maong umento, aduna kini maayong benepisyo ngadto sa mga miyembro sa Pag-IBIG fund tungod kay mosaka man usab ang ilang savings nga ilang madawat kon sila moretiro o kun mo-mature ang ilang savings.
Sa kasamtangan, miabot na sa P36.95 billion ang savings sa Pag-IBIG Visayas gikan sa Enero hangtod sa Septiyembre karong tuiga. (HBL)