DILI na makabalik sa ilang pagtinda sa night market ug bisan sa sidewalk sa Dakbayan sa Sugbo kon mapamatud-an nga gibaligya sa vendor ang iyang prebelihiyo sa pagtinda.
Ang mga kawani sa Cebu City Government nga giingong nalambigit sa binuang di na usab makabalik sa ilang trabaho.
Kini ang mga bahad ni Mayor Edgardo Labella labot sa mga report nga gibaligya sa ubang mga vendor ang ilang pwesto ngadto sa laing mga tawo labing ubos P10,000 para maoy mohulip og paninda sa night market sa dalan Colon.
Si Labella nitahas na kang City Attorney Rey Gealon sa pagsubay sa maong mga report ug pagsilot sa mga tawo nga nalambigit sa gihulagway sa mayor nga “corrupt practices”.
“They have to be cancelled, they should not be allowed to vend. The purpose there (night market) is they will be given an opportunity to vend dili magnegusyo,” padayag ni Labella.
Ang mayor nagkanayon nga korapsyon ang rason nganong dugay niya gibalik ang night market sanglit sa miaging administrasyon, nakadawat usab siya og mga report nga adunay mga tawo nga nakakwarta sa night market.
Si Labella niingon nga iyang gi-tap ang mga barangay official sa Ermita, Parian, Kalubihan ug Sto. Niño aron masiguro nga han-ay ang night market kay adunay mga opisyal nga nagtutok gawas sa buhatan ni City Administrator Floro Casas Jr. ug Market Administrator Jonil Matuguina.
Hipos sa basura
Gipadayag ni Matuguina nga sugod kagabii, ang mga vendor na ang mangunay sa paghipos sa ilang kaugalingon nga basura inig tapos matag gabii sa night market.
Ang pamahayag sa market administrator nitumaw human nagpasad ang mga basura sa karsada panahon sa kadlawon kay lagi ang matag stalls adunay gibayran nga kolektor sa ilang basura.
Gipasalig ni Matuguina nga alas 4 sa kadlawon, wa nay makita nga basura sa Colon bunga sa gipahigayon nga night market.
Ang Department of Public Services (DPS) maoy mokolekta sa mga basura sa night market matag kaadlawon.