ANG inter-agency Technical Working Group (TWG) sa motorcyle taxis kun habalhabal nirekomendar sa paglugway og unom ka mga buwan sa pilot implementation sa motorcycle taxis aron makaapil ang bag-ong mga player sa pagtuon.
Sa usa ka pamahayag nga giisyu sa Martes, Disyembre 10, ang TWG niingon nga ang mga proposal nadawat gikan sa unom ka motorcycle companies, nga mao ang Citimuber, JoyRide, MoveIt, EsetGo, Sakay, ug VroomGo, sa Nobiyembre 20, 2019.
Ang pilot run, nga matapos sa Disyembre 26, bugtong naglambigit lang sa Angkas bikers sa Metro Manila ug Metro Cebu.
Ang hukom sa proposed extension ipagawas sa di madugay, matod sa Department of Transportation (DOTr).
Si TWG chairperson Antonio Gardiola Jr. niingon nga ang extension sa pilot run maghatag og panahon sa TWG sa pagpanguhag dugang data aron pagdeterminar sa viability sa mga motorsiklo isip luwas nga matang sa pampublikong transportasyon.
Maghatag usab kini sa publiko nga dunay kapilian ug magpugos sa daghang providers sa pagpalambo pa sa ilang standard sa pagserbisyo. (MVI, SunStar Philippines)