ANG pamilya ni Medelina Yamazaki, ang babayeng nag-viral ang video sa iyang pagkasaba ug pag-atake sa usa ka promodiser sa usa sa mga mall sa Dakbayan sa Sugbo niadtong Sabado sa gabii, Disyembre 7, 2019, nidumili sa pagpyansa.
Si Yamazaki gipasakaan og tulo ka mga kaso.
Si Police Executive Master Sergeant Jeffrey Larrobis, Mabolo Police Station chief investigator, niingon nga ang nag-unang rason sa iyang pamilya mao nga gusto nilang si Yamazaki mopailawom sa psychiatric evaluation sa di pa sila mopyansa.
“Ang iyang relatives, auntie, nag-ingon nga dili kuno mo bail. Ila pa kuno ipa-undergo og psychiatric evaluation. We already informed them nga naa na ang resolusyon sa kaso regarding sa mga piyansa,” siya niingon.
“According sa ilang abogado nga murag maltreated siya (Yamazaki) sa gamay pa and nag suffer og post-partum,” siya nidugang.
Si Yamazaki gipasakaan og kasong physical injury, threat, ug malicious mischief sa Cebu City Prosecutor’s Office sa Lunes, Disyembre 9. Matag kaso dunay girekomendar nga pyansa nga P3,000, matod ni Larrobis.
Si Jennifer Fabillar, biktima, giabagan sa mga representante sa Mia Maison Home Fragrance, iyang employer, sa pagpasaka sa mga kaso.
Ang information o resolution gikan sa piskal sa kaso ni Yamazaki gipagawas sa Miyerkules sa buntag, Disyembre 11.
Sa Miyerkules, si Yamazaki gipriso gihapon sa Mabolo Police Community Precinct (PCP) 2.
Si Yamazaki gidakop human niya labaya ang promodiser og humidifier.
Si Yamazaki nisulti sa kapulisan nga siya nasuko dihang si Fabullar nikasaba kaniya sa iyang paghupot sa humidifier.
Si Fabillar nihangyo kaniya nga mag-amping aron di mayabo ang tubig sa humidifier.
Nasuko si Yamazaki dihang ang nauwahi nisulti kaniya sa paghunong ug gilabay niya ang humidifier sa nawong ni Fabillar.
Matod ni Larrobis, ang kampo ni Yamazaki unang nihangyo kanila nga pagawason si Medelina gikan sa PCP, nga wa nila gitugot.
“Maybe they thought dugay pa magawas ang resolution sa kaso mao initially ni request nga ipa pull out sa detention facility unya ilang i-adto sa psychiatric facility. Unya di man pwede gud na kay na inquest naman na nya kami paninglan sa fiscal,” siya niingon.
Si Larrobis niingon nga kon si Yamazaki di mopyansa karong adlawa, dad-on siya sa Cebu City Jail sa Barangay Kalunasan, Dakbayan sa Sugbo.