ALAS utso sa buntag, adlawng Miyerkules. Nahuman na ang misa sa alas siyete sa Redemptorist Church. Nanggawas na ang mga nanimba. Ang Isuzu Crosswind nga asul nga gimaneho ni Charlie nag-ungot na sa ‘stop light’ sa eskina nga gawsanan paingon sa Mango Avenue. Naglingkod sa iyang luyo sa ‘passenger seat’ ang iyang amo, si Mrs. Manto nga usa ka biyuda. Bag-o lang silang nahuman og simba ug mamauli na sila sa Talamban.
Unya may milabang nga usa ka tiguwang lalake. May kuyog siyang batang lalake nga di momenos sa sayis anyos ang edad. Mga espoting silang duha. Nindot kaayo ang diyaket nga gisul-ob sa tiguwang, ‘imported’ ang hitsura. Bag-o ug mahalon sab ang gisul-ob nga T-shirt sa bata. Nagtuo si Charlie nga gikang nanimba ang duha.
Dihang nakalabang na ang duha mihunong sila tungod sa bentana sa Isuzu dapit sa drayber. Nakita ni Charlie nga mikangkang ang tuong kamot sa tiguwang tungod sa bentana habig kang Charlie. Serado man ang mga bildo sa bentana kay ‘aircon’ man ang sakyanan. Unya ang walang kamot sa tiguwang misenyas nga morag naghungit og hangin sa iyang baba. Nagpasabot kini nga ang tiguwang nangayog kuwarta aron ipalit og pagkaon.
Nakalitan gyud si Charlie. Naisa ang iyang kilay. Wa god siya magdahom nga makililimos ang tiguwang. Kasultihon siya nga, ‘Ibaligya ang imong diyaket aron ipalit og pagkaon.’
“Tagai lang, Charlie,” matod ni Mrs. Manto nga daling nakakuot og ‘coin’ nga singko pesos gikan sa iyang ‘coin purse.’ Daw nabasa niya ang hunahuna ni Charlie.
Gidawat ni Charlie ang kuwarta nga gitunol kaniya ni Mrs. Manto. Giablihan niya ang bentana ug gihatag sa tiguwang ang kuwarta.
“Di man angayan nga magpakilimos tawhana, Ma’m!” ni Charlie dihang nakalarga na sila.
“Proud na gyud sila sa ilang pagka makililimos! Segurado ko nga hinatag sab tong ilang gisul-ob. Apan dapat gihipos lang kini nila, kay mora na man hinuon silag adunahan sa ilang hitsura!” ni Mrs. Manto.
Nahikatawa si Charlie nga nagpanglingo-lingo. (Katapusan)