SUPERBALITA CEBU

Niñal: Miss U

Eskina

GANADOS,” gibasa nako ang ngan sa akong class record. Way tubag. “Ganados,” gikusgan nakog gamay akong tingog. Wa gihapoy tubag. “Gazini Ganados,” gikompleto na gyod nakog basa ang ngan.

“Absent si Ganados, Sir,” mitubag ang usa ka estudyante sa luyo.

Panagsa ra ko mag-roll call, ug matag roll call nako, mataymingan pirmi nga absent si Ganados. Isip titser, wa kaayo koy problema anang estudyante nga mo-absent kay otro pud ko nga absenot. Apan kon magpirmi na, lisod na pud.

“Kinsay friends diri ni Ganados, please kog ingon niya nga exam na next week,” giingnan nako ang klase. “Akong ingnon, Sir,” mitubag tong estudyante sa luyo.

Pirmirong adlaw human sa exam week, sa wa pa ko magsugod og discuss, may estudyante nga miduol nako. Labihang gwapaha bayhana. Taas kaayo, morag siya tingali pinakataas nga babaye sa Cebu Normal University atong panahona. Nag-make up pero nipis lang, lutaw gihapon iyang natural nga kaanyag. May highlights ang buhok nga daw nagsilbing frame sa iyang maanyag nga dagway.

“Sir, good morning. Ganados, Sir,” ingon siya. “Oy, ikaw diay si Ganados,” mitubag ko. Sa tinuoray, wa ko kaila niya kay panagsa ra lagi mosulod.

“Sorry, Sir, wa ko kaapil sa exam,” miingon siya. Ingon siya na-busy kuno siya sa unsa to nga beauty pageant, nalimot na ko, Miss Talisay ba to, Miss Cebu, Binibining unsa ba.

Dali ra ko kaestorya. Ang mga estudyante may lain-laing rason nganong mo-absent. Ang uban namatyan og lola, gilubong si lola, nag death anniversary si lola, nabanhaw sa ikatulong adlaw si lola. Ang uban birthday sa ilang iring. Way problema na.

“Ok, balik ugma. Hatagan tikag special exam,” ako siyang giingnan. Ug ako pud siyang gihatagan og special assignments agig bawi sa iyang mga absences. Nagpasalamat siya. Human ato, wa na ko kita niyag balik sa eskuylahan.

Usa ka adlaw, duha ka tuig ang milabay, naglakaw ko daplin sa dalan sa may Punta Princesa diin ko nagpuyo. May van nga miagi sa akong kilid dayon mihunong sa unahan. Naay minaog nga babaye nga morag artista ang porma. Mikaway-kaway sa akong nahimotangan. Milingi-lingi ko sa luyo. Wa may tawo. Ako gyod tingali iyang gitagad.

“Siiiiir, kumustaaa!” eksayted pa niya nga tagad nako. Oy, si Ganados man diay. Nagkumustaay mi kadiyot. Kadiyot ra kay samot ko kamubo tapad niya.

Morag nakadungog ko nga miingon siyag “miss you.” Mi-blush kog gamay. Apan pagka-feeling ra diay nako atong panahona, kay karon sure na ko nga “Miss U” diay to iyang gisulti.

Padayon, Gazini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph