AMBOT og nadayon ba. Morag wala na may balita. Unang migawas ang balita pinaagi sa iyang abogado nga si Atty. Amado Virgil Ligutan nga mokiha si kanhi mayor Tomas Osmena batok kang Vice Mayor Mike Rama og mga kaso nga nakasupak sa Anti-graft and Corrupt Practices Act ug sa Ethical Standards for Public Officials and Employees ngadto sa Visayas Ombudsman. Laing upat pa ka mga opisyal nga miserbisyo sa administrasyon ni Rama niadtong mayor pa siya nga mga sakop sa Committee on Awards, iapil usab sa pagkiha.
Ang maong mga kaso gumikan sa pagbaligya ni Rama, niadtong mayor pa siya sa 45 hektaryas nga luna sa South Road Properties (SRP) ngadto sa Ayala Land Inc., SM Prime Holdings ug Filinvest. Mi-insister si Tomas nga anomaloso ang maong transaksiyon. Nahalin ang maong mga luna og mokabat ngadto sa P16 bilyones diin ang maong kantidad wa gamita ni Tomas sa dihang namayor siya og balik niadtong 2016.
Samtang katungod ni Tomas ang pagpasaka og kaso batok kang bisan kinsa pinasikad sa tumo-tumo nga mga ebidensiya, apan makapangutana lamang kita kon nganong karon pa man kini niya himoa. Nabalik siya sa 2016 pagkamayor ug impluwensiyado ug gamhanan siya niadto. Nganong wa man siya maghikutar? Gumikan kay wa na siyay trabaho karon ug panglawgaw lang kining iyaha?
Bisan niadtong wala pa siya makalingkod human siya midaog sa 2016 nga piniliay batok ni Rama, ang iyang unang lakang mao ang pagdiskasi sa transaksiyon kay lagi anomaloso. Nahuman na lang iyang termino ug napilde siya ni Mayor Edgardo Labella, wala gyud niya mahimo. Karon mi-interes na usab siya? Unsa man iyang tumong, personal o pulitika?
Kon wa pa unta na niya lawgawa ang mga proyekto diha sa SRP sa mga nakapalit, dugay na unta na kaayong nakabuylo. Nagsugod na unta ang konstraksiyon diha sama sa SMX convention center ug hotels. Daghan na unta nga mga Sugboanon ang nakatrabaho. Mas maayo pay maghilom na lang ka, Tomas. (bobbygnalzaro@gmail.com)