NAKADUNGOG si Maria nga dunay kagubot sa tugkaran sa iyang igsuon nga si Pekto samtang siya didto sa barangay hall. Sa iyang pag-uli, iyang gisultihan ang iyang anak nga si Anton nga dunay kagubot sa tugkaran sa iyang uyoan.
Gibadlong siya sa iyang inahan sa di pag-adto, apan wa gyud mopatuo si Anton. Mao nga iya na lang kining gisundan. Maoy iyang naabtan ang iyang pag-umangkon nga si Roger nga nihapak og kahoy kang Anton, makaduha sa wala nga aping ug likod sa ulo.
Natumba si Anton sa yuta. Sunod nga gibunalan ni Roger mao si Dondon, ugangan ni Anton. Makaduha gyud gibunalan sa nawong nga maoy nakaingon nga milugaw ang iyang mga mata ug giusban pa sa ulo hinungdan sa pagkatumba sa yuta.
Mga igsuon ni Roger nga sila si Jovy, Marlon ug Pede ingon man ang ilang amahan nga si Eloy nagtinabangay sa pagbunalbunal sa duha ka mga biktima.
Nibalik paggawas sa balay si Roger ug nibunalbunal sa duha ka mga biktima.
Si Marlon niingon nga wa siyay sala mao nga boluntaryo siyang ni-surrender. Sila si Eloy, Roger ug Jovy dunay laing bersyon.
Matod nila nga niabot si Anton nga nagsige og pamalikas, nanghulga kanilang sila pamatyon samtang nagdala og kutsilyo. Gidunggab niini si Pede apan maayo na lang kay nakalihay.
Nag-inilugay sila sa kutsilyo apan nalupig sa kusog si Pede, nadunggaban gyud siya sa tiyan. Dihang usban na unta ni Anton og dunggab si Pede, si Marlon nikuha og kahoy ug gibunalan sa nawong makatulo ka mga higayon si Anton.
Natumba si Anton sa yuta.
Niabot si Dondon ug dihang bunalan na sab unta og kahoy si Marlon niini, naunhan siya.
Makaduha maigo sa aping si Dondon hinungdan nga kini natumba. Iyang gibunalbunalan
sila si Anton ug Dondon aron di mabuhi.
Wa sila makahibawo kon diin si Maria atol sa insidente. Niadto sa ospital si Pede aron magpatambal sa samad sa tiyan. Nitahan usab pagkaugma si Marlon.
Katuohan ba nga self-defense ang gihimo sa mga akusado? Di ba si Maria wa diha atol sa pagsugod sa sambunot? Sad-an ba ang mga akusado? Sa unsa man nga kaso?