SIKOP ang usa ka lalaki kinsa giingong ‘person of interest’ o posibleng dunay kalambigitan sa pagpatay sa drayber sa dyip pinaagi sa buy-bust operation niadtong Disyembre 10 mga alas 4:00 sa hapon sa Yacapin Extn., Brgy 34, ning siyudad sa Cagayan de Oro.
Ang dinakpan nailang si Rholand Edralin, 35, minyo, taga Calaanan, Canitoan ning siyudad kinsa giingong person of interest sa pagpatay kang Ronald Cuizon, 42, minyo ug drayber sa Talakag liner, kinsa residente sa Phase 2B Calaanan, Barangay Canitoan ning siyudad.
Kahinumdoman nga gipusil patay si Cuizon niadtong Disyembre 3 mga alas 4:30 sa kaadlawon sa P.N Roa, Canitoan ning dakbayan.
Gibutyag ni PMaj Aldren Baculio, hepe sa Police Station 7 (PS7) sa Bulua nga gikonsiderang ‘person of interest’ si Edralin kini human duna silay panagbangi tali sa duruha kalabot na usab sa ilegal nga druga ug giingong gihulga na usab niini si Cuizon.
Nasikop si Edralin human napalitan og ilegal nga druga nga gibanabanang anaa sa P500 ug narekober usab ang P150.00 nga personal niini nga kwarta ug cellular phone.