PATAY na nga nakaplagan ang giingong founder sa investment scam human naghikog alas 2:50 sa hapon niadtong Martes sa Koronadal City sa probinsiya sa South Cotabato.
Giila ang biktima nga mao si Ailene Alvizo Manahan, 35, founder sa ACSI Akma Community Solution nga nahimutang sa Doña Lourdes Barangay Zone 3 sa nahisgutang siyudad.
Gibutyag ni Koronadal City chief of police Lieutenant Colonel Joefel Siason nga nagresponde ang iyang mga sakop sa tawag sa mga paryente ni Manahan nga nagpahibawo nga naghikog siya sulod sa iyang balay sa Barrio 6 sa dakbayan.
Naabtan sa mga pulis nga nagbitay ang biktima gamit ang pisi nga gihigot sa iyang liog kon diin ang pikas tumoy gihigot sab sa kisame nga bahin sa kuwarto.
Kahinumdoman nga una nang gidakop sa mga pulis si Manahan sa General Santos City sa reklamo sa mga nabiktima niini apan nakapiyansa ug nabuhian.
Gitakda unta nga mag-payout niadtong Martes ang scam queen apan naghikog kini nga maoy hinungdan nga wa madayon.
Ang kapulisan sa Koronadal City Police Station walay nakitang foul play sa ilang imbestigasyon sa nahitabo ni Manahan.