GITUN-AN karon sa Ombudsman-Visayas kon pasakaan ba og kasong kriminal ug administratiba batok ni Mayor Sonia Pua sa lungsod sa Carmen human nadawat na sa buhatan ang mga ebidensya.
Si Assistant Ombudsman Virginia Palanca Santiago niingon nga nadawat na sa graft investigator ang mga dokumento nga gipangayo sa ilang buhatan.
Kini kabahin sa pasangil nga sa gasoline station nga gipanag-iya ni Mayor Pua magkuhaan og gasoline ug krudo ang tanang sakyanan sa munisipyo.
Lakip sa pagtudlo sa iyang anak sa mayor nga municipal assessor nga wa mahasubay sa insaktong proseso ug ang premyo sa sinulog nga nadaog sa contingent nga wa giindusar sa tresurero sa lungsod.
Matud ni Santiago nga tungod sa kadaghan sa kaso nga ilang giimbes-tigar, nadilatar ang pagre-sulbar sa maong kaso.
Gipadad-an og subpoena sa Ombudsman sila si Municipal Treasurer Myrla Capuno, Municipal Accountant Dinah Barriga ug ang Human Resource Management Officer nga si Vicenta Camonggay.
Si Capuno nisubmitir og daghang kopya sa vouchers sa tanang nagasto sa siyudad sa fuel ug si Barriga misubmitir sa mga dokumento.
Sa pagkakaron dili pa makahatag ug dugang komentaryo si Santiago sa resulta sa ilang gihimo nga inbestigasyon, samtang naghuwat pa siya sa “evaluation” nga gihimo
sa ilang graft investigator.
Kon madawat na unya ni Santiago ang resulta sa evaluation, iya kining tun-an ug mopagawas sa iyang rekomendasyon kon pasaka-an ba ug kaso si Mayor Sonia Pua.
Usa ka tinubdan sa Ombudsman nibutyag nga pipila ka mga Opisyal sa Gobyerno ang nasilotan human namatud-an nga nagpahimulos kini sa iyang katungdanan.
Kahinumdoman, usa ka Achiles Hermoso Morales, usa ka kanhi kawani sa munisipyo ang mipasaka ug reklamo batok sa Mayor niadtong milabayng buwan sa Septiyembre sa milabayng tuig.
Si Morales nagkanayon nga didto gikuha sa kaugalingon nga gasoline station sa mayor ang gasolina ug krudo sa mga sakyanan sa lungsod.
Ang Mayor sa iyang bahin niangkon sa isyu sa gasolina ug nanghimakak sa dugang pa nga pasangil batok kaniya. (JFT)