GILANGKAT sa University of Southern Philippines Foundation (USPF) Panthers ang unang lingkuranan sa finals sa 2019 Minglanilla Mayor’s Cup Inter-collegiate Christmas League pinaagi sa paglubong sa Southwestern University (SWU)-Phinma Cobras, 87-69, sa Sports Complex sa lungsod sa Minglanilla Miyerkules sa gabii, Disyembre 11, 2019.
Ang pagpalta sa import sa SWU-Phinma nga si Thiam Lamine mao’y naghatag sa sayon nga kadaugan sa USPF kinsa gipangulohan sa ilang reinforcement nga si Sameen Swint nga mipakatap og 29 puntos, upat niini gikan ka three-point area.
Gikan pa lang gani sa sinugdanan, ang Panthers mipakita gilayon sa ilang dominasyon ug wa gyud kini mohatag og igong kahigayonan sa Cobras, ang bag-ong Cebu Schools Athletic Foundation, Inc. champion.
Sa kadaugan, ang Panthers hingpit nga miharos sa ilang mga duwa sa elimination round hinungdan nga otomatiko kining nakasulod sa finals.
Samtang ang Cobras (1-1) makigsangka sa defending champion UV Green Lancers, (1-1) alang sa knockout match nga gikatakda kagabii, Huwebes, Disyembre 12.
Ang modaog ning panag-engkuwentro mao’y makaangkon sa ikaduhang luna sa finals diin ilang ikasangka ang USPF Panthers sa championship game Biyernes, Disyembre 13, samtang ang mapildi mao’y mosakbang sa University of San Jose-Recoletos Jaguars alang sa third place honor.
Ipahigayon gilayon ang awarding ceremony sa tinuig nga kompetisyon nga gipasiugdahan sa local government unit (LGU) sa lungsod sa Minglanilla nga gipangulohan ni Mayor Elanito Pena ug vice-mayor Loben Geonzon.
Mokabat ngadto sa P200,000 nga ganting salapi ang nakahan-ay sa usa ka semanang kompetisyon.
Gawas sa championship trophy, ang kampiyon makadawat og P100,000 nga cash prize samtang P60,000 ang makuha sa runners-up.
Laing P30,000 ug P15,000 ang mabulsa usab alang sa third ug fourth placers.
Mga puntos:
USPF (87)- Swint 29, Estado 14, Chavez 13, Ursal 8, Delos Reyes 7, Patalinhug 5, Isabelo 4, Langahin 3, Sarahina 2, Mendez 2. SWU-Phinma (69) - Cachuela 20, Roncal 18, Sanchez 7, Polican 6, Bilao 6, Nazareno 4, Imperial 4, Cabansay 2, Ebardo 2. (JBM)