MOABOT sa 66 ka mga struktura sa coastal barangay sa lungsod sa Moalboal ang gitan-aw nga gub-on human nasuta nga ilegal ang nahimutangan niini.
Kini maoy gipahibaw sa opisyal sa Department of Environment and Natural Resources (DENR) 7 Jose Cleo Cary Colis.
Ang lugar sa Basdiot ug Poblacion West duha lang sa tulo ka mga barangay nga misupak sa environmental laws human milapas kini sa three-meter-easement zone.
Sagad sa mga struktura mga bar ug kan-anan.
Tungod niini, giisyuhan ug Notice of Violation ang 37 ka mga operators sa mga commercial estabishments sa Barangay Basdiot ingon man ang laing unom pa ka mga operators sa nahisgutang barangay.
Apan ang nadawat nga notice sa operators nagtudlo sa 20-meter-easement violation.
Ang pangulo sa Provincial Environment and Natural Resources Office (Penro, Rodel Bontuyan mipasabot nga tungod sa gihimong pag reclassify sa pipila ka bahin sa foreshore land may laing notice pa nga ipadala ang buhatan aron ma klaro ang three-meter-easement violation.
Sa gipahigayon nga profiling sa PENRO, 35 sa 37 ka mga commercial establishments ang may kompleto ug permits apan duha lang ang may Special Use Agreement in Protected Areas (SAPA).
Unom ra usab ang nakakuha ug Environmental Compliance Certificates (ECC).
Ubos sa Republic Act 7586 o ang National Integrated Protected Areas System Act of 1992, mihulagway nga ang SAPA usa ka tenure instrument nga makahatag ug kahigayonan sa mga operators nga magamit ang protected area sa maayong paagi.
Gawas sa mga illegal nga struktura, nasayran nga kuwang usab og discharge permits ang mga establisimento.
Hinungdan nga buot sa Gobernador Gwendolyn Garcia nga ipa-susi og mopahigayon ug tagging ang PENRO sa mga lugar nga duna gihapoy struktura nga gikinahanglan nang matangtang.
Sama sa mga Mantayupan Falls sa Barili ug Kawasan Falls sa Badian, buot sa lalawigan sa Sugbo nga muumol ug Ecotourism Development Plan nga magpalambo sa lugar pinaagi sa pagpahigayon ug mga environmental activities.
Gikatakda nga sa sunod semana, mosumiter og report ang Penrongadto sa Gobernador.
Samtang karong Disyembre 19, 2019 gikatakda usab nga makigtagbo si Garcia sa mga operators aron tukion ang maong hisgutanan. (ANV)