SAMA sa opening, pakurat sab ang closing ceremonies sa 30th Southeast Asian (SEA) Games nga giduyugan sa usa ka grandiyoso nga seremonya sa New Clark Athletics Stadium sa Capas, Tarlac, Miyerkules sa gabii, Disyembre 11.
Tuod man gituman sa mga delegado sa Pilipinas ang saad nga buhaton ang tanan aron sila manguna sa pagpanghakot og medalya sa biennial meet.
Natapos ang SEA Games, diin mihakot ang nasud og 149 gold, 118 silver ug 120 bronze medals.
Mihayag ang kawanangan uban nagpaka-paka og mabulukong fireworks display, uban pa ang makabilib nga drone show.
Nag-perform sab ang grupo sa Filipino-American artist apl.de.ap nga Black Eyed Peas.
Sa pikas bahin, wa katambong si Presidente Rodrigo Duterte, diin nahimo niyang representante si Executive Secretary Salvador Medialdea.
Nagpasalamat sab ang Philippine Southeast Asian Games Organizing Committee (Phisgoc), MGA sports official sa suporta sa administrasyon sa malampusong hosting sa nasud sa 30th Southeast Asian Games.
Sunod tuig, ang biennial meet himuon sa Vietnam.
‘Wonderful job’
Gidayeg sa palasyo ang mga nagpaluyo sa malampusong SEA Games lakip na ang mga partisipante niini.
Si Presidential Spokesman Salvador Panelo nagkanayon nga malipayon ang nasud nga nahimong host sa biennial multi-sport event sa mga silingang nasud.
“All of you did a wonderful job giving pride and honor to your respective countries. Your very presence here alone means you are all winners,” suma niya.
“We likewise witnessed harmony, camaraderie and sportsmanship prevailing among countries in Southeast Asia,” dugang sa opisyal.