USA ka lalaki ang nakaplagang patay nga napuno sa daghang samad dinunggaban sa sagbutan nga bahin sa sementeryo sa Tibungco Public Cemetery, dakbayan sa Davao.
Kini base sab sa nadawat nga impormasyon sa Bunawan Police Station bandang alas 9 sa buntag Huwebes, Disyembre 12, gikan sa caretaker sa nahisgutang sementeryo bahin sa patay nga lawas.
Ang biktima ulahing nailhan nga si Ronie Simeon Pascua, 22, ulitawo, trabahante sa Cargo Airport Sasa, Davao City ug molupyo sa Purok 13, Barangay Tibungco.
Ebidensiya nga nakita gikan sa crime scene mao ang usa ka kutsilyo sa kusina nga nagsukod og 13 sentimentros nga way kuptanan.
Gibutyag sa nagresponde nga Scene of the Crime Operation team, pangulohan ni Police Lieutenant Michael Ondras, Regional Crime Laboratory Office (RCLO)-Davao nga ang biktima nakaangkon og daghang mga samad dinunggaban sa lawas nga maoy hinungdan sa iyang hinanaling kamatayon.
Sumala pa nga gibanabana nga gipatay ang biktima mga alas 2 hangtud 3 sa kaadlawon Huwebes.
Motibo ug ang bansagon sa suspek o mga suspek padayon pang gideterminar sa kapulisan.
Patay nga lawas sa biktima gihatud ngadto sa Rivera Funeral Homes, Licanan, Barangay Lasang ning siyudad aron nga ipailawom sa otopsiya. (WGM)