‘Campaign leaders’ gisangag mga bala

(Pinaambit nga hulagway)
(Pinaambit nga hulagway)

MAGUINDANAO PROVINCE -- Away sa politika ang gilantaw sa mga awtoridad nga motibo sa pagpamanhig sa magtiayon alas 3:25 sa hapon niadtong Miyerkules, Disyembre 11, Guindulungan sa probinsiya.

Mga samaran giila nga sila si Jocie Kuit, municipal treasurer sa Ampatuan ug iyang bana nga si engineer Jeric nga pulos kanhi campaign leaders sa usa ka congressman sa niaging eleksiyon.

Gibutyag ni Maguindanao Police Provincial Office director Colonel Arnold Santiago nga sakay ang mga biktima sa Montero Sports nga dunay plaka nga CAM-4811 gikan sa Cotabato City ug pabalik na unta sa Ampatuan.

Apan pag-abot sa Barangay Bagan sa Guindulungan, kalit silang gipaarakan og mga bala sa wala mailhing mga tawo gamit ang M16 Armalite rifles.

Nahulog ang sakyanan sa daplin nga bahin sa bung-aw sa national highway nga gisakyan sa mga biktima.

Abtik sab nga miikyas ang mga suspek nga giingong nisakay og duha ka motorsiklo paingon sa ngiob nga bahin sa nahisgutang lugar.

Mga biktima daling gitabang ug gihatud sa nagrespondeng kapulisan ug sundalo ngadto sa Maguindanao Provincial Hospital diin pulos giingong anaa sa grabeng kahimtang.

Gikompirma sab ni 2nd District Congressman Esmael Mangudadatu nga mga campaign leader niya ang magtiayon sa nakalabay nga piniliay.

Imbestigasyon sa hitabo padayong gilusad sa kapulisan sa Guindulungan Municipal Police Station. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph