MAWAB, Davao de Oro -- Wa mahitsura ug naugdaw ang transmitter sa Radio 99.9 RF FM human gisunog sa wala mailhing mga suspek didto sa Purok 12, Brgy. Tuburan alas 6:45 sa gabii, Miyerkules, Disyembre 11, 2019.
Ang FM Station gipanag-iyahan ni Paterno Lucero Pacquiao, kanhi public information officer sa Davao del Norte.
Sa gihimong pakipaghinabi sa Superbalita kang Senior Police Officer 2 Amsali Gandarosa, imbestigador sa Mawab Municipal Police Station, gisaysay niini nga usa ka wala mailhing tawo ang nakit-an sa mga nakasaksi ang mikaratil og dagan palayo human nasunog ang nahisgutang transmitter sa lugar.
Sumala pa nga ang suspek daling nisakay sa nagpaabot nga motorsiklo nga gimaneho sa wala mailhing drayber.
Narekober gikan sa crime scene ang trapo nga maoy gituohang gigamit sa pagsunog sa transmitter.
Gibanabana nga mga nasunog nga kahimanan nagkantidad og di moubos sa P1 milyon.
Sa pikas bahin, gikasubo og dako ni Lucero Pacquiao kinsa namahayag nga ang nahitabo usa ka pagyatak sa katungod sa mga media aron mapugngan ang paghatud sa matuod nga balita ngadto sa katawhan.
Apan bisan pa man og maundang ang pagsibya sa radyo sa kahinganinan, sumala pa, nga padayon ang paghatud og balita pinaagi sa social media.
Dugang ni Pacquiao nga gisalig niya sa kapulisan ang kasulbaran sa krimen ug nanghinaut nga mailhan ug madakpan ang responsable sa pagpanunog.
Sa pagsulat ning maong balita wa pay matumbok nga suspek ang mga kapulisan sa Mawab MPS apan hugot ang gihimong paningkamot aron masulbad ang maong krimen.