TUNGOD sa mga kakulian nga di kapugngan, ilisan na usab ang makontra ni kanhi interim World Boxing Association (WBA) featherweight champion Jhack Tepora karong Disyembre 21, 2019 didto sa Toyota Arena sa Toronto, California.
Ning higayona, ikasinukliay sa kumo sa undefeated nga Tepora mao ang beterano ug kanhi world champion nga si Oscar Escandon sa 10-round fight.
Ang orihinal unta nga ikontra ni Tepora ma si Bryan de Gracia sa usa ka title eliminator alang sa no. 1 ranki sa World Boxing Association (WBA).
Sa unsa nga rason, wa kini mahinayon hinungdan nga ang kanhi world title contender nga si Chris Avalos maoy giingong mihulip ni de Gracia. Apan ning uwahiay lang, giilisan na usab si Avalos ug ikasangka sa kanhi Cebu-based fighter, mao na si Escandon.
Sa online interview ni Edri Aznar sa Sun.Star-Cebu, si Tepora miangkon nga wa na siyay panahon nga motan-aw pa sa estelo sa iyang kontra pinaagi sa tape ug adto na lang siya ibabaw sa ring mo-adjust sa inawayan niini.
Iyang gitug-an nga 35-anyos na man tuod si Escandon apan dili pa kini angay kompiyansaan tungod sa kataas na sa kasinatian niini.
Si Tepora wala pay pildi sa 23 ka away nga may 17 ka knockouts samtang ang Colombian nga si Escandon mitali og 25-5 nga aduna usay 17 ka knockouts.
Kini maoy ikaduhang malisod away ni Tepora didto sa Estados Unidos. Ang una mao ang iyang pagpakigsangka ni Jose Luis Gallegos niadtong Hunyo didto sa San Jacinto, California. Si Tepora kasamtangang no. 3 sa International Boxing Federation (IBF). Si Josh Warrington maoy kasamtangang kampiyon sa maong iyang division.
Tinguha karon ni Tepora ang impresibong kadaugan aron makaaway alang sa world title. (JBM, EKA)