GISAWAY ni Yaw-Yan Ardigma Cebu founder Master Benigno “Ekin” Caniga ang desisyon sa mga judges human napildi si Renan “Flash” Noblefranca sa iyang comeback fight.
Alang kaniya usa ka dakong surambaw ang maong desisyon.
“Grabi kaayo ang desisyon. Barag ang kontra kada round, pero mao gihapon ang midaog. Arang-arang pa siguro og ila tong gitabla,” matod ni Caniga sa dihang nahinabi sa Sun.Star Cebu.
Si Nobleranca napildi pinaagi sa unanimous decision ni Ely Fernandez sa Muay Thai main event sa “Fight Paradise Kibawe” niadtong Disyembre 7, sa Kibawe Municipal Gym sa Bukidnon.
Kini maoy unang away ni Noblefranca human sa hataas nga paghuway. Katapusang niyang saka sa ring niadtong 2013 didto sa Estados Unidos. Samtang sa laing bahin, gipaundang ni Joseph Mercado sa Yaw-Yan Ardigma Cebu si Jay Tancontian sa tap out sa opening round sa ground-and-pound sa mixed martial arts fight. (JBM, EKA)