SUPERBALITA CEBU

Sugilanon: Si Enteng ug ang hotcake

PADUNG si Enteng sa ilang Nang Etang, mga alas tres sa hapon, para mangayo og kamunggay. Gisugo siya sa iyang Nanay kay magluto kini og utan Bisaya para panihapon. Apan sa wala pa siya makaabot sa balay sa tiguwang, nakatimaho siya og hotcake gikan sa ilang Noy Eloy.

“Aguy, nagluto diay si Noy Eloy og hotcake karon da. Lami baya na siya moluto og hotcake kay iyang butangan og tsokolit powder o di ba, Royal Tru Orange. Baga ug lumoy pa gyud nang iyang hotcake, di pareha anang nipis nga ga-yellow lang nga baligya sa plasa,” matod ni Enteng sa iyang kaugalingon.

“Hoy, nganong gakibot-kibot nang simod nimo diha, Enteng?” pangutana ni Miyot nga bata-bata ni Noy Eloy. Padung ang 22-anyos nga lalake sa balay sa iyang amo dihang iyang nakit-an si Enteng nga nagtanga sa tunga sa dalan ug nakig-estorya sa kaugalingon.

Nakugang si Enteng sa tagmingon nga tingog ni Miyot. Grabe ang iyang kahinam sa hotcake nga wala na siya makabantay nga imbis mopadung siya sa ka Nang Etang, sa ilang Noy Eloy na man diay siya gidala sa iyang mga tiil.

“Ay, ikaw diay na, Noy Miyot! Nakatimaho man gud ko sa hotcake nga giluto ni Noy Eloy ug naghandom ko sa kalami niini,” tubag ni Enteng.

“Aw, ganahan diay kag hotcake, Enteng?” ni Miyot nga nahikatawa sa hitsura sni Enteng.

“Ganahan mulang! Dalha ko sa ilang Noy Eloy, Noy Miyot bi, para makakaon kog hotcake. Sige na, Noy Miyot! Bisan tabangan pa tikag pamupho ug iti sa manok basta makakaon lang ko sa linuto ni Noy Eloy,” hangyo ni Enteng kang Miyot nga pwerteng ngisi.

“Na hala, dali, kuyog nako,” ni Miyot nga mipadayon paglakaw padung sa ka Noy Eloy.

Misunod dayon si Enteng kang Miyot ug tuod man galuto gyud og chocolate hot cake si Noy Eloy. Mga upat na ka haon ang iyang nahimo ug gipabugnaw na niya kini sa lamesa.

Minglingin ang mga mata ni Enteng pagkakita sa mga hotcake. Wala lang siya kahibawo nga naa diay kiniy sagol nga marijuana. Mao kini ang pagabuhaton sa 40-anyos nga si Noy Eloy kon ganahan siya mopakaon og hotcake sa iyang mga batos. Imbis nga mag pot session sila, magluto siyag hotcake nga binutangan og marijuana.

“Boss, amo, mangayo kuno si Enteng og hotcake. Bisan kunog papuphuon nimo siyag iti sa manok basta makakaon lang kuno siya,” sulti si Miyot kang Noy Eloy.

Mingisi lang ang hingkod nga lalake kang Miyot. Mihiwa siya og hotcake ug gihatag kang Enteng. Gidawat kini ni Enteng mikaon dayon niini.

“Aguy, kalami gyud ani! Salamat kaayo, Noy Eloy,” nagkanguhal nga sulti ni Enteng.

Wa siya makabantay nga miagik-ik og katawa si Noy Eloy ug si Miyot. Tungod sa ilang kalingaw, gihatagan pa nila ug tulo ka hiwa nga hotcake si Enteng nga gihamong-hamong lang sa ulitawo. Pagkahuman og tulon ni Enteng sa ikaupat nga hiwa, nahisarasay siya ug mitug-ab.

“Unsa diay naa aning hotcake, Noy Eloy? Nalipong lagi kog gamay,” matod ni Enteng nga dali rang nadutlan sa marijuana.

“Wala ra, Enteng,uy! Uli na sa inyo, lakaw na. Basin gipangita na ka ron sa imong nanay,” nahimuot nga namulong ni Noy Eloy.

Gawandog-wandog nga miuli si Enteng sa ilaha nga walay dala nga kamunggay. Nalimtan na niya ang sugo sa iyang inahan sa kalami sa hotcake.

Pag-abot sa ilang balay, nalatusan si Enteng sa iyang nanay gamit ang ulo sa silhig tukog apan gapunay lang kinig tingsi samtang gainiktin og likay sa bunal. (Katapusan)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph