TALAGSA-ON kining prinsipyo ni Arnis grandmaster Dionisio Canete. Niadtong 2016 mi-petisyon siya sa Supreme Court nga tangtangan siya sa iyang titulo pagka-attorney. Tungod kini sa grabeng kahiubos sa iyang gituho-an nga malisyusong pagka-pildi sa siyam sa 10 ka kaso nga iyang gisang-at sa fiscal’s office gikan sa tuig 2014 hangtud 2016. Nakuratan ko sa dihang nakighinabi siya kanako mahitungod sa iyang petisyon sa Labaw’ng Hukmanan tungod kay iya kining propesyon sud sa 56 ka tuig. Niadtong Enero 31, 2017 gihatag sa Korte Suprema ang iyang gipangayo ug gitangtangan siya sa iyang pagka-abogado. Sukad niadto, wala siya mohunong sa iyang protesta batok sa tulo ka mga piskal nga iyang gidudahan. Hangtud nga gikiha ug gidakop siya sa mga pulis. Bisan makahimo unta siyang mobutang og P60,000 nga piyansa aron mahatagan og temporaryong kagawasan, wa siya mo-piyansa kay iyang i-dramatize ang iyang pagka-butang.
Talagsaon kining prinsipyo nga ingon sa kang Cañete labi na kay 82 anyos na siya. Dili siya ordinaryong arnis grandmaster kay chairman emeritus siya sa World Eskrima Kali Arnis Federation (WEKAF). Bag-o lang siya mi-abut gikan sa Southeast Asian Games tungod kay usa siya ka dakung opisyal sa arnis didto.
•••
Anaay mga tawo sa Estados Unidos (US) nga dili gustong i-display ang belen sa mga publikong dapit panahon sa Pasko . Kining gitawag og belen magpakita sa dapit nga gituhoan sa mga Kristiyanos nga maoy natawhan ni Hesus, kauban ang iyang inahan ug mga mananap, ug tulo ka hari nga nagdalag mga gasa.
Ang Santo Papa Francis mi-adto sa lungsod sa Greccio, silangan sa Roma aron pagbisita sa dapit diin si St. Francis of Assisi misugod niining maong tradisyon pinaagi sa pagbutang og labing unang belen niadtong 1223. Didto iyang gipirmahan ang papal document nga naila nga Apostolic Letter nga gi-ulohan “Admirabile Signum,” (Wonderful Sign) sa kahulogan ug importansiya sa belen. Didto sa US, ana-ay mga grupo nga supak niining belen nga i-display sa mga publikong dapit kay sumala nila nakalapas kini sa first amendment sa ilang batakang balaud nga nagdili sa paghimo og state religion. Apan ang ilang hukmanan nagtuo nga wala kini makasupak sa ilang konstitusyon.
•••
Gibalik na usab nga two-way ang Almendras St., Barangay Kasambagan, Cebu City. Problema kining dalana kon paagi-an og sakyanan ug moliko sa wala inig-abut sa eskina F. Cabahug St. Mao kini ang makababag sa mga sakyanang mopadung sa Ayala gikan sa Mandaue City. Karon nga nahuman nag ayo ang dan Almendras, gibalik na usab ang left turn sa F. Cabahug. Mahimo ra man unta nga ang mga sakyanan gikan sa Lahug adto lang moliko sa may traffic light sa eskina San Jose dela Montaña ug F. Cabahug. Calling the attention of the Cebu City Transportation Office. Estudyohi ninyo pag-ayo kining sitwasyon sa maong dapit kay traffic kaayo diha labi na kay wa ma-adjust og tarong ang traffic light diha. (mannyrabacal1144@gmail.com)