DAGHANG mga pasiaw sa edukasyon nga gihuwat ni Renato Palang ug sa iyang mga kauban sa tagay didto sa Compostela. Sama sa estudyante nga nisulti sa iyang amahan, “Tay, nangharos ko sa eskuylahan.” Matod sa amahan, “Sa unsa nga subject anak?” Tubag sa bata, “Sa Home Economics, Tay. Nag-utan mi, akoy nangharos sa kamunggay.”
Laing estudyante nisulti ngadto sa iyang amahan, “Tay, ang akong mga classmate pulos zero sa Math.” Sukna sa amahan, “Ikaw anak, pila man imong score?” Tubag sa anak, “Ang-ang, palupig diay ko. Zero sab.”
Dihay bata nga mapasigarbuhong nisulti sa iyang amahan nga nakakuha siyag 100 sa Science ug Math. Pagtan-aw pa sa amahan sa iyang mga test results, ang score sa iyang anak 50 sa Science ug 50 sa Math.
•••
Ang di komedya mao ang resulta sa pagtuon nga gihimo sa Programme for International Student Assessment (Pisa). Sa maong pagtuon, sa 79 ka mga nasud, nangiwit ang mga Pilipinong tinun-an sa reading comprehension ug ikaduha gikan sa kinaubsan sa Math ug Science.
Pero daghan kaayong bright sa Math. Sama ni Pedro nga gipangutana sa iyang maestra, “Pedro, kon tagaan ta ka og duha ka itoy unya pun-an nako og duha ka itoy, pila na man ka buok imong itoy?” Tubag ni Pedro, “Lima ma’am.” “Ngano man?” sukot sa maestra. “Naa na man koy usa ka itoy sa amo,” tubag ni Pedro.
Pero nganong nangiwit man ang mga Pilipinong estudyante sa reading comprehension sa survey sa 79 ka mga nasud? Nagpasabot ba kini nga makabasa sila apan di makasabot sa ilang gibasa?
•••
Niadtong miaging tuig pa miapil sa Pilipinas sa Pisa. Maong karon pa nahibaw-an nga nangiwit ang mga Pilipinong estudyante. Ang makapakunot sa agtang mao nga unom ka tuig ang nilabay, gipatuman sa Department of Education ang K+12 program.
Nagpasabot ba kini nga pakyas ang K+12 program? Daghan ang midayeg sa maong programa. Apan pakyas ang kagamhanan sa pagsulbad sa kakuwang sa mga magtutudlo ug sa mga classroom. Mao nga ang mga estudyante nagdasok nga morag mga sardinas sa average nga 44 ka estudyante sa matag classroom.
Laing sulbaron mao ang kalidad sa mga magtutudlo. Niadtong Marso ning tuiga, ang resulta sa Licensure Exam for Teachers (LET) nagpakita nga 27.28 porsento lang ang nipasar sa mga elementary teacher examinees ug 25.95 porsento sa secondary teacher examinees.