ORMOC City, Leyte - Babaye nga nangilad sa usa ka bugasan nasikop sa kapulisan sa Barangay Cogon ning dakbayan, Biyernes, Disyembre 6, 2019.
Giila ang suspek nga si Melitona Batoon, anaa sa hustong edad, taga Barangay Nueva Sociedad ning dakbayan.
Gibiktima sa suspek ang usa ka Felomino Laurente, taga Barangay Doña Feliza Mejia ning dakbayan,
Si Laurente igsuon ni Liga ng mga Barangay Ormoc chapter President Esteban ‘Bebe’ Laurente.
Base sa report sa kapulisan, ang suspek nagdala og sampol sa baligyang bugas ngadto sa biktima.
Kay nakauyon si Laurente, nagpahatud siya og unom ka mga sako apan gipangayuan og P6,000 nga pasiunang bayad.
Kapin usa ka oras nga paabot, wa na mahibalik si Batoon ug gisaad nga bugas.
Dali nga mi-report sa kapulisan ang biktima ug gipahigayonan ang pagpangita.
Nasakpan sa kapulisan ang suspek sa may Simbahan sa Fatima sa Barangay Cogon ug nakuhaan og mga ‘budol’ nga kwarta nga dunay 12 ka tag P1,000 ug tulo ka tag P500.
Gikustodiya sa kapulisan ang dinakpan.
Ang kapulisan mipahimangno sa publiko nga di basta basta mosalig sa dili kaila hilabi na niining nagsingabot nga Pasko nga daghan ang mga mangingilad. (JKDP)