NABIKTIMA ang manag-uyab nga nag-date sa gang-rape ug pagpatay.

Ang dalagita gilugos samtang gipusil-patay ang lalakeng minor de edad dihang wa motuman sa gimando sa unom ka mga lalake nga ningta-bang pagdagmal sa ang iyang uyab.

"The Manny Pacquiao Blog". Click here for stories and updates on the Filipino boxing champ.

Ang biktima nga si Russell Booc, 16, taga Barangay Buaya, dakbayan sa Lapu-Lapu gipaum-om sa sumbohan sa armas dayon gipusil.

Ang bala nag-ungot pa sa ulo niini.

Samtang, ang dalagita nga gi-gang rape nitug-an nga siya ug ang iyang hinigugma pulos sakop sa Crips gang.

Sa pasiunang imbestigasyon ni SP02 Federick Eslit sa Crime Against Person’s Desk sa Lapu-Lapu City Police Office (LLCPO) nga si Booc uban sa iyang hinigugma nga 16-anyos nag-date sa Barangay Buaya kagahapon sa mga alas 2:00 sa kaadlawon.

Nilabang sa highway ang duha ka mga biktima aron sa mamalit og burger ug sa ila nang pagbalik adunay unom ka mga lalake nga nag-atang kanila kansang mga nawong gitaptapan ug panyo nga blue.

Gitionan sa wa matino nga kalibre sa armas ang mga biktima dayon gidala sa luyo nga bahin sa usa ka pribadong tunghaan sa maong dapit ug gitabangan una og kulata si Booc.

Human sa pagkulata ni Booc nagbanos-banos sa paglugos ngadto sa babaye nga biktima sa unom ka mga suspek samtang nagsud-ong ang hinigugma nga naputos na sa bun-og ang kalawasan.

Matod pa ni Eslit sa dihang nahinabi sa Sun.Star Superbalita nga human gilugos sa unom, gimandoan si Booc nga maoy mosunod sa pakighilawas ngadto sa uyab niini apan nagdumili ang biktima.

Sa kapungot sa mga suspek nga wa motuman sa ilang mando si Booc, gipaum-om kini sa sumbohan sa armas ug gipusil. Nisibat dayon ang mga suspek palayo sa maong dapit.

Ang babaye gi-turn over sa Women’s Desk ug gikatakda nga dad-on sa Pink room sa Vicente Sotto Memorial Medical Center (VSMMC) aron ipahiling.

Samtang gidala sa Westland Funeral Parlor ang lawas ni Booc.

Dugang pa ni Eslit nga wa silay witness nga moila sa mga suspek bugtong ang babaye nga biktima maoy nihulagway sa nahitabo.