DOH: 45% pagsaka sa mga kaso sa dengue

USA ka buwan sa dili pa matapos ang 2019, natala na ang 45 porsyentong pagsaka sa kaso sa dengue sa Enero ngadto sa Nobiyembre itandi sa mga kaso sa susamang buwan sa 2018.

Sa datus sa Enero 1 hangtod Nobiyembre 30 karong tuiga, niabot na og 26,967 ka mga kaso sa dengue ang natala sa Central Visayas ug 135 na ang patay itandi sa 18,649 ka mga kaso ug 107 ka patay sa 2018.

Nagpabilin nga nag-una ang Dakbayan sa Sugbo, Lapu-Lapu, ug Mandaue sa mga tag-as nga kaso.

Sa dakbayan sa Sugbo, anaa na sa 3,160 ka mga kaso ang natala ug 20 ang patay karong tuiga itandi sa 3,111 ka mga kaso ug 15 ang patay sa 2018.

Gisundan usab kini sa Dakbayan sa Lapu-Lapu diin natala ang 1,494 ka mga kaso ug tulo ang patay itandi sa 1,639 ka mga kaso ug upat ang patay sa 2018.

Ikatulo usab sa aduna’y labing daghang mga kaso ang Dakbayan sa Mandaue diin anaa natala nga 969 ka mga kaso ug upat ang patay itandi sa 1,108 ka mga kaso ug duha ang patay sa 2018.

Kon basehan ang mga kaso sa dengue ug nangamatay sa dengue matag tuig, ikaduha na ang 2019 sa aduna’y labing taas nga kaso sulod sa 10 ka tuig ang nakalabay. Mosunod kini sa 2016 ka mga kaso nga aduna’y natala nga 28,991.

Alang sa Nobiyembre, natala nga taas ang mga kaso sa dengue sa mga barangay sa Dakbayan sa Sugbo nga naglakip sa Guadalupe, Inayawan, Pardo, Labangon ug Tisa.

Sa Dakbayan sa Mandaue, taas ang kaso sa mga barangay sa Basak, Pakna-an, Pagsabungan, Canduman, ug Cabancalan.

Samtang sa Dakbayan sa Lapu-Lapu, nasulod ang mga barangay sa Basak, Pusok, Gun-ob, Mactan, ug Bankal sa taas nga mga kaso.

Kahinumduman nga karong tuiga, gideklarar sa Department of Health ang nasod sa National Dengue Alert.