BABAYE nga tighimo sa barangay clearance sa Hipodromo sa siyudad sa Sugbo ang nadakpan sa mga sakop sa Sawang Calero police station 6 atol sa buy bust, alas 11:00, Miyerkules sa gabii, Disyembre 11.
Ang dinakpan giila nga si Anna Liza Araujo Mendez alyas “Aling”, 40, taga sitio Magpalacir, Barangay Hipodromo sa siyudad sa Sugbo.
Nakuha gikan kaniya ang mga pinakete sa gituohang shabu sa dihang gipaubos sa pag rekisa si Mendez nga mobalor ang tanan sa P27,200.00.
Matod ni Police Major Kenneth Paul Albotra ang hepe sa Sawang Calero police station nga kapin sa usa ka semana nilan nga gipanid-an si Mendez human migawas ang iyang pangalan nga maoy gipalitan sa ilang usa sa mga dinakpan.
Atol sa surveillance nasuta nga dili kini magpataka og baligya sa dili niya kaila nga maoy hinungdan nga mikuha silag tawo nga nakaila sa ilang target.
Alas 11 sa Miyerkules sa gabii sa sitio Magpalacir ilang gilusad ang buy bust operation nga miresulta sa iyang pagkasikop.
“Amo siya nga gi monitor, nag baligya gyud siya og shabu sa iyang barangay pero gi pili niya ang iyang customer kay dili siya mo baligya kung wala siya kaila. Mao to migamit tag tawo nga naka ila niya maong nadakpan nato siya.” Matod ni Police Major Kenneth Paul Albotra.
Wala hinuon malakip sa high value target ang dinakpan apan, matod ni Albotra, nga dugay na kini sa iyang illegal nga negosyo.
Hugot matod pa kining gihimakak ni Mendez sanglit usa lang siya ka user ug dili matod pa siya mamaligya. (AYB)