GIKLARO sa Land Transportation Franchising ang Regulatory Board (LTFRB) 7 nga kining bag-ong mga MyBus units nga naabot karon sa Sugbo sa habagatang Sugbo kini mobiyahe ug dili sa lungsod sa Consolacion.
Kon nakamatikod ka online sa maong units, modagan kini gikan sa dakbayan sa Sugbo paingon sa lungsod sa Minglanilla.
Matod ni LTFRB 7 regional director Eduardo Montealto Jr., nga ang maong 14 ka bag-ong units sa MyBus nalakip pa kini sa 77 ka naaprobar nga bus units sa Metro Rapid Transit Services, Inc.
Dugang niini nga wala pay specific nga rota ang bag-ong units apan anaa sa usa ka sikat nga theme park sa Minglanilla ang turning point niini gikan sa dakbayan sa Sugbo.
Gibutyag usab ni Montealto nga posible nga gikan sa downtown sa dakbayan sa Sugbo kini maggikan.
Sa pagkakaron, wa pa sila makaissue og Provisional Authority sa maong mga units tungod kay gihuwat pa nila ang petition gikan sa operators niini.
Susama ra ang pletehan sa kasamtangan nga nagdagan nga MyBus units apan aduna’y ipuno kon paingon sa Minglanilla.
Gikatakda pa nga moluwat ang LTFRB 7 sa PA ug sa aprobado nga pletehan niini alang sa bag-ong rota sa maong MyBus.
Giklaro usab ni Montealto nga wala pa’y aprobado nga PA nga paingon sa Consolacion sukwahi sa nanggawas karon sa social media. Hinuon possible nga sa dili pa mahuman ang 2019, magdagan na kining mga bag-ong bus. (HBL)