HAN-AY na ang siguridad sa kapulisan sa Siyudad sa Sugbo alang sa unang adlaw sa Misa de Gallo sa Lunes sa kaadlawon, Disyembre 16 sa mga simbahang Katuliko sa tibuok dakbayan.
Matod ni Police Lieutenant Colonel Alan Rosario, hepe sa operations branch ug kasamtangan nga nagdumala usab sa traffic police sa Dakbayan sa Sugbo, nga ila nang giila ang dagkong mga simbahan nga angay nga patutukan sa mga pulis.
Matag simbahan pabutangan og mga police assistance center nga kon adunay problema sa mga manimbahay dali ra sila nga makaduol aron masulosyonan dayon kini.
Adunay 33 ka simbahang Katoliko ang dakbayan sa Sugbo nga ilang hatagan tanan og personnel sa Lunes sa kaadlawon.
Tanang sakyanan sa Mobile Patrol Group ipagawas sa sayong kabuntagon aron ma robingan ang mga subdivision ilabi na nga kasagaran sa mga manimbahay magbaktas lang paingun sa simbahan.
“Pina pa roving natin lahat lalo na sa mga subdivision at yung mga daanan ng mga tao papuntang simbahan ba kay umaga man yan, so, madilim pa ang mga karsada,” matod ni Rosario.
Nakig-alayon na usab ang CCPO sa simbahang Katoliko kon asa magmisa si Cebu Archbishop Jose Palma aron mahatagan usab nila og hugot nga siguridad nunot sa pagtuo nga dugokon sa daghang mga tawo.
Gipang-monitor na usab nila ang mga mangunguot nga ning panahona nagkaduol na ang Pasko ang mosiaw na usab.
Ang kapulisan wa pa maka monitor nga naay notadong mga kawatan gikan sa mga silingang rehiyon apan wa sila mokompyansa basin malutsan sila niini. (AYB)