BARBERO nga gihulagway sa kapulisan nga big-time druglord nadakpan sa buy-bust operation sa alas 8:00 sa gabii sa Brgy. Inayawan, Dakbayan sa Sugbo.
Si Ricardo Carin, 41, minyo, nanag-iya og mga salon, nagpuyo sa nahisgutang lugar, nasikop sa mga sakop sa Minglanilla Police station.
Si Major William Homoc, hepe sa Minglanilla Police station nga nahinabi sa Superbalita Cebu, nagkanayon nga ang ilang transaction ni Carin sa Brgy. Lipata, lungsod sa Minglanilla, diin dunay salon si Carin.
Apan nagsige kini og usab-usab sa ilang transaction hangtod nga giagni sila sa may Brgy. Inayawan, duol sa iyang laing salon.
Matod ni Homoc, nga ilang gipalitan og P100,000 nga balor nga drugas si Carin, gamit ang bodol money.
Atol sa operation, nakuha sa possession ni Carin ang lima ka medium nga putos sa shabu nga motimbang og 25 gramos nga mobalor og P170,000 base sa Dangerous Drugs Board (DDB) value.
Si Homoc, nibutyag nga nasubay nila si Carin human usa mga unang nadakpan nibutyag kabahin sa usa ka barbero.
Matod pa ni Homoc, nga big-time si Carin kay kinilo ang ma-supply sa drugas gikan sa lungsud sa Consolacion ug Talamban, Dakbayan sa Sugbo.
“Kini siya Barbero lang unya maayong motago sa iyang illegal nga kalihukan. Nakapanag-iyag daghang salon sa Metro Cebu. Iyaha ning plantalya,”dugang ni Homoc.
Nasubay sa kapulisan nga ang igsuon niini nasulod sab sa bilangoan gumikan sa illegal nga drugas.
Si Carin nalakip sa ilang listahan sa mga high value target (HVT). (GPL)