SUBLING gipakita sa Southwestern University (SWU)-Phinma Cobras ang ilang dominasyon batok sa University of the Visayas (UV) Green Lancers pinaagi sa pagkulit og 87-80 nga kadaugan sa ilang semifinal knockout match sa 2019 Minglanilla Mayor's Cup Inter-collegiate Christmas League nga gipahigayon sa Sports Complex sa lungsod sa Minglanilla, Cebu, Huwebes, Disyembre 12.
Sa kadaugan, ang Cobras mao'y nakakuha og katungod nga makigsakbang sa University of Southern Philippines, Foundation (USPF) Panthers alang sa kampiyonato nga ipahigayon karong gabii, Biyernes, Disyembre 13.
Samtang ang Lancers makigbatok as University of San Jose Recoletos (USJ-R) Jaguas alang sa third place honor.
Ang hugot nga kombati mao'y miabli sa first half tali sa duha ka mga team nga mao usab ang nagsangka sa Cebu Schools Athletic Foundation, Inc. finals sa niaging buwan diin ang Cobras mao'y mipatugbabaw sa kulbahinam nga series.
Mitumaw ang tensiyon sa naghinapos nga bahin sa first half sa dihang sa kalit lang gisingkahan ug gisita ni UV coach Gary Cortes ang referee nga si Lardz Dumdum.
Tungod niini, na-eject si Cortez ug didto miinit ang sitwasyon.
Usa sa mga opisyal sa referee nga si Pepe Duterte ang daling mipatunga ug miuwang apan sa samang higayon mipasidaan ni Cortes nga dili lang gyud manapat ngadto sa ilang kauban.
Sa pagkawagtang ni Cortes, ang Lancers, nga ning higayona, ubos na sa pagdumala ni assistant coach Jojo Maglasang, nakapakita pa gihapon og saktong labok.
Ang tres ni Froilan Maglasang ug ang undergoal stab ni Michael Maestre sa katapusang 3:25 segundos sa third quarter nakapasikit sa duwa, 56-57.
Misugod pag-inat ang bintaha sa SWU-Phinma sa dihang mipahagsa kini og 9-0 nga rally nga giduslitan sa usa ka hansak ug tres sa import nga si Thiam Lamine.
Miduyog usag sa ataki sa Cobras si Ramish Alforque alang sa 69-60 nga labaw nga mao'y nagsira sa ikatulong kuwarter.
Gikan niini permi nang naghupot sa komportabling bintaha ang Cobras apan sa katapusang 3:56 segundos na-fouled out ang ilang import.
Niini, ang Lancers pagpahimulos sa kahigayonan ug pinaagi ni Lass Coulibally, ilang gidominar ang ilawom nga bahin aron hinayhinay nga tibhangan ang labaw sa Cobras.
Dinhi napugos pagtawag og timeout si SWU-Phinma coach Mike Reyes aron hiusahon og balik ang opensa sa iyang nahabiling locals - butang nga natubag ra usab dayon sa iyang mga batos.
Sa hingpit nga pagkalagpot sa Lancers, usa ka butang ang maaninaw karong gabii ug kini mao nga adunay bag-ong kampiyon ang ikaduhang edisyon sa matag tuig nga kompetisyon.
Sugdan ang Cobras-Panthers title showdown sa alas otso sa gabii human sa panagsangka sa UV ug University of San Jose-Recoletos alang sa third place honor nga mosikad usab sa alas 6:30 ang takna.
Ang usa ka semanang kompetisyon gipasiugdahan sa local government unit sa lungsod sa Minglanilla nga gipangulohan ni Mayor Elanito Pena ug Vice Mayor Loben Geonzon ug gidumala ubos sa liderato ni municipal administrator Concordio Mejias, Geraldine Sereno Canedo, Jake Abella ug Ram Cadiz. (JBM)
Mga puntos:
SWU-Phinma (87) - Lamine 21, Polican 13, Cachuela 12, Imperial 8, Bilao 8, Alforque 6 Roncal 5, Evardo 4, Sanchez 2.=
UV (80) - Coulibaly 20, Butohan 11, Tarrosa 11, Maestre 9, Cabahug 7, Pepito 6, Cometa 6, Delator 5, Saga 3, Gellacone 2.
Mga duwa, Biyernes, Disyembre 13
6:30 pm. - UV vs. USJ-R (3rd place)
8:00 pm. - SWU vs. USPF(Championship)