NAKAGAWAS na ang babaye nga ni-viral sa social media dihang gilabay og humidifier ang promodiser sa mall human nakapyansa kagahapon sa buntag, Biyernes, Disyembre 13, 2019.
Gihimo nga rason sa kampo ni Medelina Yamazaki ang iyang ‘mental condition’ aron masuta nga kini dili haom nga moatubang sa husay sa mga kaso batok kaniya.
Si Mabolo Police Station chief investigator Jeffrey Larrobis niingon nga nakapyensa si Yamazaki kuyog ang iyang abogado ug kini nakagawas pinaagi sa summary procedure human sa unom ka adlaw kini nagpuyo sa sulod sa prisohan.
Gidala si Yamazaki sa korte sa Qimonda Building human nigawas na ang resulta sa iyang kaso.
Nagkantidad og P3,000 matag kaso aron makapyansa, sigon ni Larrobis.
Si Yamazaki nag-atubang og tulo a mga kaso: grave threat, malicious mischief, ug physical injury.
Ang unjust vexation, ug damage to property wala giapil sa pagpasaka sa kapulisan batok ni Yamazaki, kinsa taga Negros Occidental apan naminyo og Japanese national.
Dugang niya nga human sa 10 ka adlaw, moatubang sa korte si Yamazaki aron tubagon ang iyang mga kaso.
Matod ni Mabolo Police Station Chief Dindo Alaras, nga bisan pa man wala pa nigawas ang resulta sa psychiatric evaluation, ang sertipiko nga nagpamatuod nga kini adunay sakit sa pangisip igo nang gamiton sa pagpagawas sa suspek.
Dungag usab niya nga ang maong sertipiko gamiton sa abogado ni Yamazaki aron ipamatuod nga kini dili haom nga moatubag sa husay.
Samtang si Sherryl Guevarra, assistant operations manager sa Mia Maison nga kompanya diin promodiser nga si Jennifer Fabillar, biktima, nga bisan sa kondisyon ni Yamazaki, ipadayon nila ang pagpasaka sa kaso.
“Kahit na magkaroon sya nang psychiatric evaluation o sa mental institution ma-co-confine, we will still get to the case,” saysay niya.
Asoy sa psychiatrist nga si Yamazaki adunay bipolar disorder ug kini girekomendahan nga ipasulod sa usa ka mental institution aron matambalan.
Sumala sa pamilya ni Yamazaki nga kini nakasinati og postpartum depression sa dihang bag-o kini nanganak ug gimaltrato usab kini sa bata pa.
Dungag ni Alaras na ang pamilya ni Yamazaki nagplano nga ipadala kini sa usa mental hospital human sa rekomendasyon sa psychiatrist nga nitan-aw niini.