Sugilanon: Ang babayeng naminyo kaniya

KAPIN na sa kalim-an ang panuigon ni Nestor dihang nabiyudo siya. Nag-inusara na lang siya sa iyang panimalay. Wala silay liwat bisan usa niadtong mihalin na niyang asawa sa laing kalibutan. Kapin sa kawhaan ka tuig silang nag-uban sa kinabuhi kaniadto. Pareho silang may mga apan o diperensiya sa kinabuhi, nagkahinagbo ug nagkatakdo silang duha.

Nakalitan siya sa iyang pag-inusara. Siya na ang mag-andam ug magluto sa iyang mga pagkaon. Siya na ang manglaba sa iyang mga sapot. Siya na ang manglimpiyo sa tanang mga suok sa iyang panimalay. Gibati niya ang kapait sa pag-inusara. Wala na siyay ganang mabuhi. Di na siya buot mag-alagad nga usa ka sekyu sa kompaniya. Buot na siyang mopahulay ug magpaabot na lang sa iyang kamatayon. Unsa pa bay iyang kalingawan nga kagamay ra niyag suhulan isip usa ka sekyu nga tinikasan sa suhulan. Nakasustener lang siya sa pagpakabuhi kay ang iyang asawa kaniadto sekyu man sab. Natigbak ang iyang asawa kay may breast cancer ug wala silay salapi sa pagpatambal sa sakit niini.

Apan unsa bang pagka unsaa nga may laing babaye nga usa ka sekyu sab nga nakagusto kaniya? Kauban kini niya sa ahensiya nga iyang gialagaran. Ang nakalahi lang kay batan-on pa kini. Kapin pa sa katloan ang panuigon.

Zephanie ang ngalan sa sekyu nga mitental kaniya. Magpaguwapa ug magpahumot kini kanunay sa iyang atubangan. Dapiton siya sa pagpanuroy sa lainlaing mga dapit. Mao nga nahipunta sila sa usa ka motel ug nahinayak siya sa pakigdulog niini.

Wala na siya makapugong ug nag-ukit-ukit na siya. “Tiguwang na ako. Ngano ug unsa bay hinungdan nga nakagusto ka kanako?””

Apan si Zephanie dili motug-an kaniya ug moingon lang nga nahigugma kini kaniya ug andam nga magpakasal sila dayon bisan sa korte ug dili sa simbahan.

Napugos si Nestor sa pakigminyo kang Zephanie. Human sa duha ka buwan, may gitug-an kini kaniya, “Mabdos ako, Nestor, ug magpakasal na kita. Kay kon dili, magpakamatay ko!”

Nakasal silang duha. Apan sa wala pa manganak si Zephanie, may gibutyag kini nga naghilak, “Giluiban ako sa akong uyab kaniadto. Namunga ang among pagpakabuang. Pasayloa ako nga milimod niini kanimo. Kon di ka makapasaylo kanako, mahimo mo akong biyaan.”

Guwapa ug batan-on ang iyang ikaduhang asawa. Mosibog ba diay siya? Nakaliwat na siya bisan dili iyaha. Nahimuot si Nestor sa iyang bag-ong kapalaran. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph