MERRY Christmas, higala! Overweight na ba kitang tanan karong higayona?
Wala ug tuo ang imbitasyon sa kaon tungod sa mga party, igsuon. Hinay-hinay lang sa humba, litson ug ubang pagkaong mantikaon kay basig galastuhon sa ospital og dili New Year’s Resolution ang atong problemahon.
Nagatan-aw gayud kog mga drama sa managkalahing nasud, higala.
Ang kasamtangan nakong ginapanubayan mao ang, “Doctor X” nga gibidahan sa Haponesa nga si Yunekura Ryoko.
Usa siya ka freelance doctor nga adunay gasa sa pag-opera sa bisan lisod kaayo nga mga kondisyon sa pasyente.
Gikalagutan ang karakter ni Ryoko sa bisan asang ospital nga operahanan niya sa iyang pasyente tungod dili siya naga apil-apil sa pamolitika, pasipsip aron motaas ang posisyon ug dili pod siya nagabuhat og bisan unsang trabaho nga wala nanginahanglan sa iyang lisensya sa pagka-doktor.
Dili masabtan sa kadaghanan ang iyang kinaiya kay “surgery” o “pag-opera” sa pasyente iyang hobby. Dili siya nagahilambigit sa mga tradisyon sa organisasyon nga nahimong ugat sa korapsyon ug pagkahakog sa uban sa taas nga posisyon.
Ang iyang concern mao ang maoperahan og ensakto ang pasyente niya, migo.
Iyang gisaktop ang mga panahon sa pagtuon ug pagduyog sa mga kabag-ohan sa iyang propesyon diin grabe ang hagit sa mga makina ug ekipo nga gamiton aron mahimong malampuson sa operasyon.
So, ang iyang konsentrasyon anaa sa “kabag-ohan” ug “pag-atubang sa mga hagit” o “change & challenge.” Dili pasikat, promosyon, o pagdukot sa posisyon ang ginapakita sa salida, igsuon.
Drama ra hinuon ang “Doctor X” apan ginasalamin niini ang reyalidad sa atong pagpanarbaho, pare. Sama sa drama, ang pagbansay ug pagpahanas ba sa imong abilidad ang sentro sa imong pagpanarbaho, is ug bro?
Nindot ang adunay taas nga posisyon sa organisasyon kay daghan ang maayong plano ug istratiheya ang imong maaprobahan nga makatabang gayud sa tanan, apan kung benepisyo sa kaugalingon ang tuyo nimo apil kahilas kay lagi “respetado” sa maong laraw, kahakug kana!
Sa milabay nga Christmas Party of Colors sa SunStar Davao family, ang president nga si Madam Gina G. Atienza namulong sa matag-usa nga kinahanglan gayud nga mo-adopt o mosabay kita sa mga kabag-ohan sa atong palibot.
Magpadayon ang organisasyon o establishemento kung makasabay kini sa mga panginahanglanon sa konsumante, igsuon. Dili gayud malikayan ang mga “kabag-ohan” ug dili mabulag ang mga “hagit” nga nakauban niini.
Sa mga gusto mopadayon, daw pito ka pangpang ang subidahon apan adunay oportunidad ug uban pang maayuhon ang mahimong matagamtaman, igsuon.
Sa dili gusto mosabay sa balud sa kinabuhi sa kasamtangang panahon ug sa umaabot pa, dinha ra gayud ka taman, higala.
Ang pagpabilin sa kinaraang pamaagi “mabilin gyud” kay dili man makatubo.
Dili hinuon seguro lisod kaayo kung dili kita mogakus sa mga kabag-ohan apan morag wala pod kaayo’y “maayuhon” ug “bag-o” nga atong matilawan kay lagi mas gusto nato ang “kinaraan.”
Adunay mga butang nga nindot kung dili bag-ohon sama sa pagpangga ug pagrespeto sa ginikanan ug pagpreserba sa kinaiyahan apan matag-adlaw nagatuyok ang kalibotan. Desisyon nimo, igsuon kung gusto ka mosabay o mag-ba-bye. Pila ka.