Sarhento ug asawa balhog sa prisohan

DAVAO. Gipangposasan ang mag-asawa, kinsa sundalo ang bana, human masikop sa kapulisan atol sa buy-bust operation sa Tagum City, kagahapon sa buntag. (Hulagway gikan sa NBI-SEMRO)
DAVAO. Gipangposasan ang mag-asawa, kinsa sundalo ang bana, human masikop sa kapulisan atol sa buy-bust operation sa Tagum City, kagahapon sa buntag. (Hulagway gikan sa NBI-SEMRO)

TINGKAGOL sa prisohan ang usa ka sundalo ug ang asawa niini human nasikop atol sa drug bust Biyernes sa buntag, Disyembre 13, didto sa Villa Cacacho Subdivision, Barangay Mankilam, Tagum City.

Nadakpan sa hiniusang puwersa sa Philippine Drug Enforcement Agency (PDEA)-Davao, National Bureau of Investigation (NBI)-Davao, ug kapulisan sa Tagum PNP ang usa ka Staff Sergeant Ramil Edullantes, sakop sa 10 Infantry Division, ug asawa niini nga si Flora Mae.

Nakuha sa posisyon sa mga dinakpan ang walo ka gramo nga gituohang shabu, marked money, cellphone, ug drug paraphernalia.

Sumala sa kapulisan nga dugay-dugay na sab nilang gipanid-an ang lihok sa mga suspek hangtud nga gikasa ang operasyon.

Gikonsiderang high-value target (HVT) ang mga nahisgutan sa talaan sa kapulisan.

Gipangbalhog na ang mga suspek samtang giandam na ang kaso nga ipasaka kanila didto sa korte. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph