Pulis gilaparo og kaso

RECKLESS imprudence resulting to homicide ang gipasaka nga kaso batok sa pulis human iyang natapsingan patay sa naghaguros niya nga sakyanan ang usa ka traffic enforcer sa Davao City Transport and Traffic Management Office (CTTMO).

Ang biktima mao si Rey Sison, 42 anyos, residente sa Deca Homes Cabantian, ning siyudad samtang ang gikustodiya nga pulis mao si Police Lieutenant Julius Arisgado Edpalina, 42 anyos, minyo, residente sa Southbay, Barangay Lapu-Lapu, Agdao.

Si Edpalina kasamtangang nag-schooling sa Public Safety Officers Basic Course (PSOBC) sa Regional Training Center (RTC)-Davao sa Mintal, ning dakbayan.

“Kasong reckless imprudence resulting to homicide ang napasaka nga kaso batok sa pulis ug temporaryo karon nga nakustodiya sa Talomo Police Station,” ingon ni Captain Rosario Aguilar, spokesperson sa Davao City Police Office (DCPO).

Subay sa spot report sa DCPO, nasayran nga ang biktima dead on the spot kinsa miresponde sa nahitabong bangga ug nag-imbestiga sa hitabo Huwebes sa hapon, Disyembre 12.

Paspas suma pa ang dagan sa Toyota Avanza nga gimaneho sa pulis nga miagi sa nahitaboan sa bypass road sa Ma-a, ning siyudad.

Sa lahi nga paghinabi, gibutyag ni CTTMO head Dionisio Abude nga ang traffic enforcer kinsa namatay samtang naghimo sa iyang tahas, nagtrabaho na sa siyudad sulod sa siyam ka tuig. Ang lokal nga gobyerno mohatag sab og tabang pinansiyal ngadto sa enforcer.

“Kung sa performance as member ng cycle unit is wala pa akong complain nga na receive against sa kanya. Dapat respetohin ang lahat ng enforcer na nasa kalsada hindi lang CTTMO enforcer,” ingon ni Abude.

Ang patay nga lawas sa biktima gihaya na sa iyang pamilya samtang ang nasampit nga pulis gibalhog sa Talomo Police Station.