GIKATAKDA nga madawat na sa mga nabiktima sa linog sa Mindanao ang mga donasyon nga gikolekta sa Kapitolyo gikan sa mga Sugbuanon.
Sukad niadtong Nobyembre 2, 2019 hangtod sa ikaduhang semana sa Disyembre may mokabat sa P82, 229.75 nga donasyon ang nadawat sa Provincial Social Welfare and Development Office (PSWDO). Sagad sa mga donasyon mga pagkaon, tubig, sinina og hygiene kits.
Kahinumdoman nga nalangay ang pagpang apod-apud sa mga donasyon nga nakolekta ngadto sa Mindanao tungod sa pagbaylo og mga pangulo sa mga departamento nga gipa-ubos na sa opisina sa Gobernador ilabi na ang Provincial Disaster Risk Reduction and Management Office (PDRRMO) nga gipangulohan ni Neil Sanchez.
Nagkasabot na usab ang Philippine Coast Guard (PCG) alang sa pagpadala sa mga donasyon sa sunod semana. (ANV)