MOABOT na ngadto sa 6.5 kilometros ang gilay-on sa rota alang sa Sinulog solemn procession nga ipahigayon sa Enero 2020.
Gipatas-an ang rota itandi sa mga nangaging katuigan.
Gipahibawo ni Cebu City Councilor Dave Tumulak, committee on disaster risk reduction management chairman nga ilang gibalik ang orihinal nga rota base sa hangyo sa mga residente nga nanimuyo sa rota nga ma-agian.
Ang maong rota manukad sa Basilica Minore del Santo Niño, right turn Magallanes St., lahos sa dan Borromeo, left turn sa J. Alcantara St., right turn V. Rama Ave., right turn B. Rodriguez St., ngadto na sa Fuente Osmeña.
Samtang gikan sa Fuente Osmeña, right turn Osmeña Blvd., left turn sa P. Del Rosario, right turn sa Junquera St. extension, left turn sa Colon St., right turn Mabini St. balik na sa Basilica.
Kagahapon, Disyembre 13 gihimo ang inspection sa naasoyng procession route nga gipangulohan ni Tumulak, uban sa Cebu City Police Office (CCPO) chief Police Col. Gionvanni Maines, ug mga opisyal sa Basilica ug Cebu City Transportation Office (CCTO).