BANA sa usa ka pulis ang nasikop sa buy bust sa kapulisan sa Argao, alas 5:10 sa Huwebes sa hapon, Disyembre 12, 2019, sa Poblacion, lungsod sa Argao, Cebu.
Si Edgar Rufo, 44, taga Poblacion, Argao, nakuhaan og pinakete sa gituohang shabu. Mobalor ang pakete og P1,000.
Matod ni P/Maj. Ildelfonso Miranda, hepe sa Argao police station, nga si Rufo nadakpan na sa una apan nakakuha og plea bargaining agreement.
Siya nakagawas sa Cebu Provincial Detention and Rehabilitation Center sa kaso gihapon sa illegal nga drugas.
Ang kapulisan sa Argao nakadawat og report gikan sa mga lumolupyo sa Poblacion nga mibalik sa iyang illegal nga negosyo si Rufo. Busa, si Rufo gipanid-an sa kapulisan.
Sa dihang nasuta na nga mibalik sa pagpamaligya si Rufo, nagpahigayon ang drug enforcement unit sa Argao police og buy bust.
Ang buy bust gipangulohan ni Miranda mismo.
“Mibalik ni siya kay pwerting daghana sa naghatag og information namo. Mao tong akong gi-validate. Sus, tinuod gyud,” matod ni Miranda.
Matod ni Miranda nga ang asawa ni Rufo nga naa nadestino sa Police Regional Office wala na makaantos sa gihimo sa iyang bana nga maoy naka-ingon nga nakigbuwag na siya niini.
Giklaro ni Rufo nga walay kalabutan ang asawa niyang pulis tungod kay kini matod pa ang naghatag sa impormasyon sa unang pagdakop niini sa kapulisan nga miresulta sa iyang pagka-priso.
Si P/Col. Giovanie Maines, ang deputy regional director for Operation sa PRO 7, nagkanayon nga dili mahimong mag-atubang og kasong administratiba ang asawa ni Rufo.
Matod niya nga kung nag-ipon pa ang duha ug nasayod ang asawa niini sa iyang illegal nga kalihukan nga walay gihimong lakang mahimong mag-atubang si Rufo og kasong administratiba.
Ang asawa nagranggo pa og police corporal ug nadestino sa usa ka special unit sa PRO 7. (AYB)